ਬਾਰਵਾਂ ਸਮਾਗਮ -ਗੁਰੂ ਨਾਨਕ ਕਾਲਜ ਆਫ਼ ਐਜੂਕੇਸ਼ਨ ਫਾਰ ਵੀਮੈਨ ਕਪੂਰਥਲਾ ਦੇ ਵਿਦਿਆਰਥੀਆਂ ਦੇ ਸਨਮੁਖ
ਸਾਰੇ ਸਨਮਾਨਿਤ ਵਿਦਿਆਰਥੀਆਂ ਦੀ ਸਾਂਝੀ ਯਾਦਗਾਰੀ ਤਸਵੀਰ
ਦੋਵੇਂ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੀ ਵਿਦਿਆਰਥਣ ਜਸਮੀਤ ਕੌਰ ।
ਇਕੱਲੇ ਇਕੱਲੇ ਵਿਦਿਆਰਥੀ ਦਾ ਸਨਮਾਨ
ਵਿਦਿਆਰਥੀਆਂ ਵਿੱਚ ਪੰਜਾਬੀ ਭਾਸ਼ਾ ਪ੍ਰਤੀ ਰੁਚੀ ਪੈਦਾ ਕਰਨ ਲਈ ਮਹੱਤਵਪੂਰਨ ਭੂਮਿਕਾ ਨਿਭਾਉਣ ਵਾਲੇ ਪ੍ਰਿੰਸੀਪਲ ਮਨਜੀਤ ਕੌਰ ਅਤੇ ਪੰਜਾਬੀ ਵਿਭਾਗ ਵਿਭਾਗ ਦੀ ਅਧਿਆਪਕਾ ਸਪਨਾ ਸੈਣੀ ਜੀ ਦਾ ਸਨਮਾਨ।
(1) ਪ੍ਰਿੰਸੀਪਲ ਮਨਜੀਤ ਕੌਰ ਅਤੇ (2) ਪੰਜਾਬੀ ਵਿਭਾਗ ਵਿਭਾਗ ਦੀ ਅਧਿਆਪਕਾ ਸਪਨਾ ਸੈਣੀ
ਭਾਈਚਾਰੇ ਦੀ ਟੀਮ, ਪ੍ਰਿੰਸੀਪਲ ਅਤੇ ਸਟਾਫ਼
ਵਿਦਿਆਰਥੀਆਂ ਦੀ ਭਰਪੂਰ ਹਾਜ਼ਰੀ
ਮੀਡੀਆ ਸਹਿਯੋਗ
————————————————————
ਗਿਆਰਵਾਂ ਸਮਾਗਮ: ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਕਾਲਜ ਨਕੋਦਰ ਦੇ ਵਿਦਿਆਰਥੀਆਂ ਦੇ ਸਨਮੁਖ
ਕਿਉਂਕਿ ਇਸ ਮੁਕਾਬਲੇ ਵਿੱਚ ਯੋਗਦਾਨ ਪਾਉਣ ਲਈ ਨਕੋਦਰ ਕਾਲਜ ਦੇ ਦਸ ਵਿਦਿਆਰਥੀਆਂ (ਨਿਬੰਧ ਲਈ: ਵਿਸ਼ਾਖਾ, ਸਿਮਰਨ, ਮਨਜੋਗ ਸਿੰਘ, ਹਰਕਿਰਨ ਕੌਰ, ਤਮੰਨਾ ,ਅਤੇ ਪੋਸਟਰ ਲਈ: ਵਿਸ਼ਾਖਾ, ਸਿਮਰਨ, ਸੰਜੀਵਨੀ, ਕੋਮਲਪ੍ਰੀਤ ਕੌਰ, ਕਾਮਨਾ, ਅਨਮੋਲਪ੍ਰੀਤ ਅਤੇ ਸੁਮਨਦੀਪ ਕੌਰ ਵਿਦਿਆਰਥੀਆਂ) ਨੂੰ, (ਪ੍ਰਮਾਣ ਪੱਤਰਾਂ, ਮੈਡਲਾਂ ਅਤੇ ਪੁਸਤਕਾਂ ਨਾਲ) ਸਨਮਾਨਿਤ ਕੀਤਾ ਜਾਣਾ ਸੀ ਇਸ ਲਈ ਭਾਈਚਾਰੇ ਦੀ ਟੀਮ ਵੱਲੋਂ ਫੈਸਲਾ ਕੀਤਾ ਗਿਆ ਕਿ ਇਨ੍ਹਾਂ ਹੋਣਹਾਰ ਵਿਦਿਆਰਥੀਆਂ ਨੂੰ ਮਿਲ ਕੇ, ਆਪਣੇ ਹੱਥੀਂ ਸਨਮਾਨਿਤ ਕੀਤਾ ਜਾਵੇ। ਇਹੋ ਇੱਛਾ, ਇਨ੍ਹਾਂ ਵਿਦਿਆਰਥੀਆਂ ਨੂੰ ਪ੍ਰੇਰਿਤ ਕਰਨ ਵਾਲੀਆਂ, ਪੰਜਾਬੀ ਵਿਭਾਗ ਦੀਆਂ ਸੁਘੜ ਅਧਿਆਪਕਾਵਾਂ ਰਮਨਦੀਪ ਕੌਰ ਅਤੇ ਡੋਲੀ ਨਾਰੰਗ ਦੀ ਵੀ ਸੀ। ਜਿਕਰ ਯੋਗ ਹੈ ਕਿ ਵਿਸ਼ਾਖਾ ਅਤੇ ਸਿਮਰਨ ਨੇ ਦੋਵੇਂ ਮੁਕਾਬਲਿਆਂ ਵਿੱਚ ਹਿੱਸਾ ਲਿਆ।
24 ਅਪ੍ਰੈਲ 2025 ਨੂੰ ਭਾਈਚਾਰੇ ਦੀ ਟੀਮ ਦੇ ਚਾਰ ਮੈਂਬਰਾਂ (ਮਿੱਤਰ ਸੈਨ ਮੀਤ, ਨਿਰਮਲ ਸਿੰਘ ਔਟਵਾ, ਦਵਿੰਦਰ ਸਿੰਘ ਸੇਖਾ ਅਤੇ ਸੁਖਿੰਦਰਪਾਲ ਸਿੰਘ ਸਿੱਧੂ) ਨੇ ਕਾਲਜ ਜਾ ਕੇ ਮਾਂ ਬੋਲੀ ਪੰਜਾਬੀ ਦੇ ਵਿਕਾਸ ਅਤੇ ਪ੍ਰਸਾਰ ਲਈ ਯਤਨਸ਼ੀਲ ਵਿਦਿਆਰਥੀਆਂ ਦੇ ਨਾਲ ਨਾਲ ਅਧਿਆਪਕਾਵਾਂ ਅਤੇ ਇੰਚਾਰਜ ਪ੍ਰਿੰਸੀਪਲ ਪੂਜਾ ਸੁਖੇਜਾ ਦਾ ਵੀ ਸਤਿਕਾਰ ਕੀਤਾ।
ਸਾਰੇ ਸਨਮਾਨਿਤ ਵਿਦਿਆਰਥੀਆਂ ਦੀ ਸਾਂਝੀ ਤਸਵੀਰ
28 ਵਿਚੋਂ ਇਕੋ ਇਕ ਲੜਕਾ ਅਤੇ ਵਧੀਆ ਨਿਬੰਧ ਲਿਖਣ ਵਾਲਾ ਮਨਜੋਗ ਸਿੰਘ
ਇਕੱਲੇ ਇਕੱਲੇ ਵਿਦਿਆਰਥੀ ਦੇ ਸਨਮਾਨ ਦੇ ਯਾਦਗਾਰੀ ਪਲ
ਭਾਈਚਾਰੇ ਵਲੋਂ ਪ੍ਰਿੰਸੀਪਲ ਪੂਜਾ ਸੁਖੇਜਾ ਦਾ ਸਤਿਕਾਰ
ਭਾਈਚਾਰੇ ਵਲੋਂ ਪੂਰੇ ਸਮਾਗਮ ਦੀ ਰੂਹੇ ਰਵਾਂ ਰਮਨਦੀਪ ਕੌਰ ਅਤੇ ਡੌਲੀ ਨਾਰੰਗ ਦਾ ਸਤਿਕਾਰ
ਸਮਾਗਮ ਵਿਚ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਦੀ ਭਰਪੂਰ ਹਾਜ਼ਰੀ ਰਹੀ
ਮੀਡੀਆ ਸਹਿਯੋਗ
ਮਈ ਦੇ ਪਹਿਲੇ ਹਫਤੇ ਗੁਰੂ ਨਾਨਕ ਕਾਲਜ ਆਫ ਐਜੂਕੇਸ਼ਨ ਫਾਰ ਵੂਮੈਨ ਕਪੂਰਥਲਾ ਦੇ ਵਿਦਿਆਰਥੀਆਂ ਦੇ ਸਨਮੁੱਖ ਹੋਣ ਦਾ ਯਤਨ ਵੀ ਕਰਾਂਗੇ।
———————————–
ਦਸਵਾਂ ਸਮਾਗਮ : ਸਿੱਖ ਨੈਸ਼ਨਲ ਕਾਲਜ ਬੰਗਾ
—————————————
ਵਿਦਿਆਰਥੀਆਂ ਨੂੰ ਪੰਜਾਬੀ ਭਾਸ਼ਾ ਨਾਲ ਜੋੜਨ ਵਾਲਾ ਦਸਵਾਂ ਸਮਾਗਮ : ਉਤਸਵ ਵਿਚ ਬਦਲਿਆ
ਸੱਲ ਕਲਾਂ ਪਿੰਡ ਵਿੱਚ ਜੰਮੇ ਪਲੇ ਕਿਰਪਾਲ ਸਿੰਘ ਗਰਚਾ ਹੋਰੀਂ ਪੰਜ ਭਰਾ ਹਨ। ਅੱਜ ਕੱਲ ਇਹ ਸਾਰੇ ਕਨੇਡਾ ਦੇ ਵਸਨੀਕ ਹਨ ਅਤੇ ਸਖ਼ਤ ਮਿਹਨਤ ਕਰਕੇ ਆਰਥਕ ਪੱਖੋਂ ਪੂਰੀ ਤਰ੍ਹਾਂ ਨਿਸ਼ਚਿੰਤ ਹੋ ਚੁੱਕੇ ਹਨ। ਮਾਂ ਬੋਲੀ ਪੰਜਾਬੀ ਅਤੇ ਜਨਮ ਭੋਂਇ ਦਾ ਮੋਹ ਪੰਜਾਂ ਭਰਾਵਾਂ ਦੀ ਰਗ ਰਗ ਵਿੱਚ ਵਸਿਆ ਹੋਇਆ ਹੈ। ਇਹਨਾਂ ਦੀਆਂ ਜੀਵਨ ਸਾਥਣਾਂ ਵੀ ਉਹਨਾਂ ਵਾਂਗ ਹੀ, ਉਨਾਂ ਵੱਲੋਂ ਮਾਂ ਬੋਲੀ ਪੰਜਾਬੀ ਦੀ ਚੜ੍ਹਦੀ ਕਲਾ ਲਈ ਅਰੰਭੇ ਕਾਰਜਾਂ ਵਿੱਚ ਵੱਧ ਚੜ੍ਹ ਕੇ ਹਿੱਸਾ ਲੈਂਦੀਆਂ ਹਨ। ਖਾਸ ਕਰ ਕਿਰਪਾਲ ਸਿੰਘ ਗਰਚਾ ਜੀ ਦੀ ਸਾਥਣ ਨਿਰਮਲ ਕੌਰ ਗਰਚਾ ਜੀ। ਅੱਧੀ ਸਦੀ ਪਹਿਲਾਂ, ਪਿੰਡ ਢੁੱਡੀਕੇ ਤੋਂ ਉੱਠ ਕੇ ਕਨੇਡਾ ਜਾ ਵਸੇ ਨਿਰਮਲ ਸਿੰਘ ਔਟਵਾ ਅਤੇ ਉਨ੍ਹਾਂ ਦੀ ਜੀਵਨ ਸਾਥਣ ਸੁਖਦੇਵ ਕੌਰ ਦੀ ਮਨੋ ਸਥਿਤੀ ਵੀ ਗਰਚਾ ਭਰਾਵਾਂ ਵਰਗੀ ਹੈ। ਅੱਜ ਕੱਲ ਇਹ ਵੀ ਕਨੇਡਾ ਦੀ ਰਾਜਧਾਨੀ ਔਟਵਾ ਵਿੱਚ ਪੰਜਾਬੀ ਭਾਸ਼ਾ ਦੇ ਵਿਕਾਸ ਲਈ ਪੂਰੀ ਤਰ੍ਹਾਂ ਸਰਗਰਮ ਹਨ ਅਤੇ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਦੀ ਔਟਵਾ ਇਕਾਈ ਦੇ ਸੰਚਾਲਕ ਹਨ। ਮੌਕਾ ਮਿਲਦਿਆਂ ਹੀ ਉਹ ਵੀ ਪੰਜਾਬ ਵੱਲ ਦੌੜ ਪੈਂਦੇ ਹਨ। ਅੱਜ ਕੱਲ ਪੰਜਾਬ ਹਨ ਅਤੇ ਭਾਈਚਾਰੇ ਦੀਆਂ ਸਰਗਰਮੀਆਂ ਵਿੱਚ ਵੱਧ ਚੜ ਕੇ ਹਿੱਸਾ ਲੈ ਰਹੇ ਹਨ।
ਕੁੱਝ ਸਾਲ ਪਹਿਲਾਂ ਕਿਰਪਾਲ ਸਿੰਘ ਗਰਚਾ ਜੀ ਨੂੰ ਮਿਉਂਸਪਲ ਕਮੇਟੀ ਬੰਗਾਂ ਦੇ ਦਫ਼ਤਰ, ਕਿਸੇ ਨਿੱਜੀ ਕੰਮ ਲਈ ਜਾਣਾ ਪਿਆ। ਉਥੇ ਉਨ੍ਹਾਂ ਨੇ ਦੇਖਿਆ ਕਿ ਕਮੇਟੀ ਦੇ ਕਰਮਚਾਰੀ, ਕਮੇਟੀ ਦੀਆਂ ਸਰਕਾਰੀ ਗੱਡੀਆਂ ਤੇ ਪੰਜਾਬੀ ਅੱਖਰਾਂ ਵਿੱਚ ਲਿਖੇ ਕਮੇਟੀ ਦੇ ਨਾਂਵਾਂ ਨੂੰ ਮਿਟਾ ਕੇ ਹਿੰਦੀ ਅੱਖਰਾਂ ਵਿੱਚ ਲਿਖ ਰਹੇ ਸਨ। ਮਾਂ ਬੋਲੀ ਪੰਜਾਬੀ ਨਾਲ ਹੋ ਰਹੇ ਇਸ ਵਿਤਕਰੇ ਨੇ ਉਹਨਾਂ ਨੂੰ ਧੁਰ ਅੰਦਰ ਤੱਕ ਹਿਲਾ ਦਿੱਤਾ। ਪਹਿਲਾਂ ਉਨ੍ਹਾਂ ਨੇ ਕਮੇਟੀ ਦੇ ਅਧਿਕਾਰੀਆਂ ਕੋਲ ਸਖ਼ਤ ਇਤਰਾਜ਼ ਜਤਾ ਕੇ ਇਹ ਧੱਕਾ ਬੰਦ ਕਰਵਾਇਆ। ਫੇਰ ਕਨੇਡਾ ਪਹੁੰਚ ਕੇ, ਮਾਂ ਬੋਲੀ ਨਾਲ ਪਿਆਰ ਕਰਨ ਵਾਲੇ ਆਪਣੇ ਦੋਸਤਾਂ ਨਾਲ ਗੱਲ ਕੀਤੀ ਅਤੇ ਇਸ ਵਰਤਾਰੇ ਨੂੰ ਪੱਕੇ ਤੌਰ ਤੇ ਰੋਕਣ ਲਈ ਯਤਨਸ਼ੀਲ ਹੋਣ ਲਈ ਪ੍ਰੇਰਿਆ। ਮਾਂ ਬੋਲੀ ਪੰਜਾਬੀ ਦੇ ਕਨੇਡਾ ਵਸਦੇ 5 ਜੇਠੇ ਪੁੱਤਰਾਂ (ਮੋਤਾ ਸਿੰਘ ਝੀਤਾ, ਕੁਲਦੀਪ ਸਿੰਘ, ਦਵਿੰਦਰ ਸਿੰਘ ਘਟੌੜਾ, ਸਤਿਨਾਮ ਸਿੰਘ ਜੌਹਲ ਅਤੇ ਡਾ. ਜਗਜੀਤ ਸਿੰਘ ਸਿੱਕਾ) ਨੇ ਉਨਾਂ ਦੀ ਹਾਂ ਵਿੱਚ ਹਾਂ ਮਿਲਾਈ ਅਤੇ ਪੰਜਾਬੀ ਭਾਸ਼ਾ ਦੇ ਸਰਕਾਰੇ ਦਰਬਾਰੇ ਖੁੱਸੇ ਸਤਿਕਾਰ ਨੂੰ ਬਹਾਲ ਕਰਾਉਣ ਲਈ ਤੁਰੰਤ ‘ਦੂਜੀ ਗਦਰ ਲਹਿਰ’ ਸ਼ੁਰੂ ਕਰਨ ਦਾ ਸੰਕਲਪ ਲੈ ਲਿਆ।
ਪੰਜਾਬੀ ਭਾਸ਼ਾ ਨੂੰ ਸੰਸਾਰ ਪੱਧਰ ਤੇ ਦਰਪੇਸ਼ ਸਮੱਸਿਆਵਾਂ ਦੇ ਗਹਿਰ ਗੰਭੀਰ ਅਧਿਐਨ ਅਤੇ ਫਿਰ ਉਹਨਾਂ ਸਮੱਸਿਆਵਾਂ ਦੇ ਹੱਲ ਲੱਭਣ ਲਈ ਇਸ ਗਰੁੱਪ ਵੱਲੋਂ ਸਾਲ 2018 ਵਿੱਚ ਕਨੇਡਾ ਦੇ ਚਾਰ ਸ਼ਹਿਰਾਂ ਵੈਨਕੂਵਰ ਐਡਮਿੰਟਨ ਕੈਲਗਰੀ ਅਤੇ ਵਿੰਨੀਪੈਗ ਵਿੱਚ ਵਿਸ਼ਵ ਪੰਜਾਬੀ ਸਮਾਗਮ ਰਚਾਏ ਗਏ। ਇਨ੍ਹਾਂ ਸਮਾਗਮਾਂ ਵਿੱਚ ਸੰਸਾਰ ਪੱਧਰ ਦੇ ਬੁੱਧੀਜੀਵੀਆਂ ਨੂੰ ਬੁਲਾਇਆ ਗਿਆ। ਪੰਜਾਬ ਦੀ ਨੁਮਾਇੰਦਗੀ ਮਿੱਤਰ ਸੈਨ ਮੀਤ ਅਤੇ ਮਹਿੰਦਰ ਸਿੰਘ ਸੇਖੋਂ ਨੇ ਕੀਤੀ।
ਕੈਨੇਡਾ ਵਿੱਚ ਹੋਏ ਇਸ ਸਮੁੰਦਰ ਮੰਥਨ ਬਾਅਦ ਨਿਕਲੇ ਸਿੱਟਿਆਂ ਨੂੰ ਅਮਲੀ ਰੂਪ ਦੇਣ ਲਈ ਇੱਕ ਅੰਤਰਰਾਸ਼ਟਰੀ ਸੰਸਥਾ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਦੀ ਸਥਾਪਨਾ ਕੀਤੀ ਗਈ।
ਪੰਜਾਬ ਆਉਂਦਿਆਂ ਹੀ ਇਸ ਸੰਸਥਾ ਦੀ ਪੰਜਾਬ ਇਕਾਈ ਵੱਲੋਂ ਸਰਗਰਮੀਆਂ ਸ਼ੁਰੂ ਕਰ ਦਿੱਤੀਆਂ ਗਈਆਂ। ਸਰਗਰਮੀਆਂ ਅੱਜ ਤੱਕ ਜਾਰੀ ਹਨ ਅਤੇ ਇਨਾਂ ਦੇ ਉਸਾਰੂ ਸਿੱਟੇ ਵੀ ਨਿਕਲ ਰਹੇ ਹਨ। ਨਿਕਲੇ ਸਿੱਟਿਆਂ ਦੀ ਜਾਣਕਾਰੀ ਮਿੱਤਰ ਸੈਨ ਮੀਤ ਵੱਲੋਂ ਸਾਂਝੀ ਕੀਤੀ ਗਈ।
ਨੌਜਵਾਨਾਂ ਵਿੱਚ ਪੰਜਾਬੀ ਪ੍ਰਤੀ ਪਿਆਰ ਅਤੇ ਸਤਿਕਾਰ ਪੈਦਾ ਕਰਨ ਲਈ ਭਾਈਚਾਰੇ ਵੱਲੋਂ ਸਮਾਗਮਾਂ ਦੀ ਇੱਕ ਲੜੀ ਆਰੰਭੀ ਗਈ ਹੈ। ਸਿੱਖ ਨੈਸ਼ਨਲ ਕਾਲਜ ਬੰਗਾ ਦੀ ਖੁਸ਼ ਕਿਸਮਤੀ ਹੈ ਕਿ ਸਾਰੇ ਗਰਚਾ ਭਰਾ ਇਸੇ ਕਾਲਜ ਵਿੱਚ ਪੜ੍ਹੇ ਹਨ। ਜਵਾਨੀ ਸਮੇਂ ਦੀਆਂ ਸੁਨਹਿਰੀ ਯਾਦਾਂ ਗਰਚਾ ਹੋਰਾਂ ਨੂੰ ਅਕਸਰ ਕਾਲਜ ਵਲ ਧੂਹ ਲਿਜਾਂਦੀਆਂ ਹਨ।
ਸਮਾਗਮ ਦਾ ਪਹਿਲਾ ਸਨਮਾਨ ਪੱਖ
ਇਸੇ ਧੂਹ ਕਾਰਨ ਉਨਾਂ ਵੱਲੋਂ ਇਸ ਲੜੀ ਦਾ ਇਹ ਦਸਵਾਂ ਸਮਾਗਮ ‘ਆਪਣੇ’ ਸਿੱਖ ਨੈਸ਼ਨਲ ਕਾਲਜ ਬੰਗਾ ਵਿੱਚ ਰੱਖਿਆ ਗਿਆ। ਸਮਾਗਮ ਵਿੱਚ ਜਿੱਥੇ ਕੈਨੇਡਾ ਇਕਾਈ ਦੇ ਕਿਰਪਾਲ ਸਿੰਘ ਗਰਚਾ, ਸਤਨਾਮ ਸਿੰਘ ਜੌਹਲ, ਜਸਵਿੰਦਰ ਸਿੰਘ ਗਰਚਾ, ਨਿਰਮਲ ਸਿੰਘ ਔਟਵਾ, ਨਿਰਮਲ ਕੌਰ ਗਰਚਾ ਅਤੇ ਸੁਖਦੇਵ ਕੌਰ ਨੇ ਹਾਜ਼ਰੀ ਲਗਵਾਈ ਉੱਥੇ ਪੰਜਾਬ ਇਕਾਈ ਦੇ ਮਿੱਤਰ ਸੈਨ ਮੀਤ, ਮਹਿੰਦਰ ਸਿੰਘ ਸੇਖੋਂ, ਪ੍ਰੋ ਇੰਦਰਪਾਲ ਸਿੰਘ, ਸੁਖਿੰਦਰ ਪਾਲ ਸਿੰਘ ਸਿੱਧੂ, ਹਰਬੰਸ ਸਿੰਘ ਅਖਾੜਾ, ਮੇਜਰ ਸਿੰਘ ਛੀਨਾ, ਪ੍ਰੋ ਕਰਮ ਸਿੰਘ ਸੰਧੂ, ਸੁਰੇਸ਼ ਕੁਮਾਰ ਚੌਹਾਨ ਅਤੇ ਲੈਕਚਰਾਰ ਸੁਭਾਸ਼ ਕੁਮਾਰ ਹੋਰਾਂ ਨੇ ਵੀ ਸ਼ਿਰਕਤ ਕੀਤੀ। ਪੰਜਾਬੀ ਭਾਸ਼ਾ ਦੇ ਤਕਨੀਕੀ ਵਿਕਾਸ ਲਈ ਸੰਘਰਸ਼ਸ਼ੀਲ, ਯੂਕੇ ਤੋਂ ਆਏ ਸਿੰਦਰਪਾਲ ਸਿੰਘ ਹੋਰਾਂ ਦੀ ਹਾਜ਼ਰੀ ਨੇ ਸਮਾਗਮ ਦੀ ਹੋਰ ਸ਼ੋਭਾ ਵਧਾ ਦਿੱਤੀ।
ਇਸ ਕਾਲਜ ਦੇ ਪੰਜਾਬੀ ਭਾਸ਼ਾ ਵਿੱਚ ਸਾਹਿਤ ਸਿਰਜਣ, ਸ਼ੁੱਧ ਪੰਜਾਬੀ ਉਚਾਰਨ, ਗਾਇਨ ਅਤੇ ਸੋਹਣੀ ਲਿਖਾਈ ਰਾਹੀਂ ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਪ੍ਰਸ਼ੰਸਾਯੋਗ ਯੋਗਦਾਨ ਪਾਉਣ ਵਾਲੇ 10 ਵਿਦਿਆਰਥੀਆਂ (ਗੁਰਪ੍ਰੀਤ ਸਿੰਘ, ਸੁਖਮਨਵੀਰ ਸਿੰਘ, ਇੰਦਰਪ੍ਰੀਤ ਕੌਰ, ਸ਼ਾਹਿਦ ਅਲੀ, ਸੰਜਨਾ, ਪ੍ਰਵੀਨ, ਮਨਜਿੰਦਰ ਕੌਰ, ਸਿਮਰਨ, ਹਰਮਨਦੀਪ ਕੌਰ ਅਤੇ ਯੁਵਰਾਜ ਸਿੰਘ) ਨੂੰ ਪ੍ਰਮਾਣ ਪੱਤਰਾਂ, ਮੈਡਲਾਂ, ਪੁਸਤਕਾਂ ਅਤੇ ਬੈਗਾਂ ਨਾਲ ਸਨਮਾਨਿਤ ਕੀਤਾ ਗਿਆ।
ਸਨਮਾਨਿਤ ਕੁਝ ਵਿਦਿਆਰਥੀਆਂ ਦੀ ਯਾਦਗਾਰੀ ਤਸਵੀਰ
ਇੱਕਲੇ ਇੱਕਲੇ ਵਿਦਿਆਰਥੀ ਦੇ ਸਨਮਾਨ ਦੇ ਯਾਦਗਾਰੀ ਪਲ
ਸਮਾਗਮ ਦਾ ਦੂਜਾ -ਚਿੰਤਨ ਪੱਖ
ਪ੍ਰਧਾਨਗੀ ਮੰਡਲ
ਨਿਰਮਲ ਕੌਰ ਗਰਚਾ, ਪ੍ਰਿੰਸੀਪਲ ਤਰਸੇਮ ਸਿੰਘ ਭਿੰਡਰ, ਕਿਰਪਾਲ ਸਿੰਘ ਗਰਚਾ, ਮਿੱਤਰ ਸੈਨ ਮੀਤ, ਜਸਵਿੰਦਰ ਸਿੰਘ ਗਰਚਾ ਰਚਾ ਅਤੇ ਨਿਰਮਲ ਸਿੰਘ ਔਟਵਾ
ਉਤਸ਼ਾਹ ਨਾਲ ਭਰੇ ਵਿਦਿਆਰਥੀ ਅਤੇ ਮਹਿਮਾਨਾਂ ਦੀ ਹਾਜ਼ਰੀ
‘ਪੰਜਾਬੀ ਭਾਸ਼ਾ ਨੂੰ ਦਰਪੇਸ਼ ਸਮੱਸਿਆਵਾਂ ਅਤੇ ਉਨ੍ਹਾਂ ਦੇ ਹੱਲ’
ਵਿਸ਼ੇ ਤੇ ਬਾਹਰੋਂ ਆਏ ਵਿਦਵਾਨਾਂ ਵੱਲੋਂ ਚਿੰਤਨ ਕੀਤਾ ਗਿਆ। ਚਿੰਤਨ ਵਿੱਚ ਕਿਰਪਾਲ ਸਿੰਘ ਗਰਚਾ ਜਸਵਿੰਦਰ ਸਿੰਘ ਗਰਚਾ, ਸਤਨਾਮ ਸਿੰਘ ਜੌਹਲ, ਨਿਰਮਲ ਸਿੰਘ ਔਟਵਾ, ਪ੍ਰਿੰਸੀਪਲ ਤਰਸੇਮ ਸਿੰਘ ਭਿੰਡਰ, ਮਿੱਤਰ ਸੈਨ ਮੀਤ , ਮਹਿੰਦਰ ਸਿੰਘ ਸੇਖੋਂ, ਹਰਬੰਸ ਸਿੰਘ ਅਖਾੜਾ ਅਤੇ ਪ੍ਰੋਫੈਸਰ ਇੰਦਰਪਾਲ ਸਿੰਘ ਨੇ ਆਪਣੇ ਆਪਣੇ ਵਿਚਾਰ ਪੇਸ਼ ਕੀਤੇ।
ਵਿਦਿਆਰਥੀ ਆਪਣੀ ਆਪਣੀ ਕਲਾ ਦਾ ਜ਼ੋਹਰ ਦਿਖਾਉਂਦੇ ਹੋਏ
ਸਮਾਗਮ ਦਾ ਤੀਜਾ -ਸਤਿਕਾਰ ਪੱਖ
ਵਿਦਿਆਰਥੀਆਂ ਵਿੱਚ ਪੰਜਾਬੀ ਪ੍ਰਤੀ ਰੁਚੀ ਪੈਦਾ ਕਰਨ ਲਈ ਕਾਲਜ ਦੇ ਪ੍ਰਿੰਸੀਪਲ ਤਰਸੇਮ ਸਿੰਘ ਭਿੰਡਰ ਅਤੇ ਪੰਜਾਬੀ ਵਿਭਾਗ ਦੀ ਮੁਖੀ ਡਾਕਟਰ ਨਿਰਮਲ ਪ੍ਰੀਤ ਕੌਰ ਦਾ ਭਾਈਚਾਰਾ ਵੱਲੋਂ ਪੁਸਤਕਾਂ ਨਾਲ ਸਤਿਕਾਰ ਕੀਤਾ ਗਿਆ।
ਕਾਲਜ ਵੱਲੋਂ ਭਾਈਚਾਰੇ ਦੇ ਕਾਰਕੁਨਾਂ ਦਾ ਸਤਿਕਾਰ
ਸਮਾਗਮ ਨੂੰ ਸਫ਼ਲਤਾ ਪੂਰਵਕ ਸਿਰੇ ਚਾੜਨ ਵਿੱਚ ਕਾਲਜ ਦੇ ਸਟਾਫ਼ ਦਾ ਯੋਗਦਾਨ
ਕਾਲਜ ਦੇ ਪੰਜਾਬੀ ਵਿਭਾਗ ਦੇ ਪ੍ਰੋ.ਤਜਿੰਦਰ ਸਿੰਘ, ਡਾ. ਪੂਜਾ, ਪ੍ਰੋ.ਹਰਪ੍ਰੀਤ ਕੌਰ ਅਤੇ ਪ੍ਰੋ.ਹਰਪਾਲ ਕੌਰ ਦੇ ਨਾਲ ਨਾਲ ਬਾਕੀ ਵਿਭਾਗਾਂ ਦੇ ਪ੍ਰੋ. ਆਬਿਧ ਵਕਾਰ, ਡਾ. ਕਮਲਦੀਪ ਕੌਰ, ਡਾ. ਅੰਮ੍ਰਿਤ ਕੌਰ, ਅਤੇ ਡਾ. ਇੰਦੂਰੱਤੀ ਨੇ ਵੀ ਸਮਾਗਮ ਦੀ ਰੌਣਕ ਵਧਾਈ।
ਅਖ਼ੀਰ ਵਿਚ ਡਾ. ਇੰਦੁਰੱਤੀ ਵਲੋਂ ਸਮਾਗਮ ਵਿੱਚ ਹਾਜ਼ਰ ਵਿਦਿਆਰਥੀਆਂ ਤੇ ਪਤਵੰਤਿਆਂ ਦਾ ਧੰਨਵਾਦ ਕੀਤਾ ਗਿਆ।
ਸਾਰੇ ਸਮਾਗਮ ਦੀ ਰੂਹੇ ਰਵਾਂ
ਪੰਜਾਬੀ ਵਿਭਾਗ ਦੀ ਮੁਖੀ ਡਾਕਟਰ ਨਿਰਮਲ ਪ੍ਰੀਤ ਕੌਰ
ਇਸ ਸਮਾਗਮ ਨੇ ਜਿੱਥੇ ਵਿਦਿਆਰਥੀਆਂ ਵਿੱਚ ਪੰਜਾਬੀ ਭਾਸ਼ਾ ਪ੍ਰਤੀ ਸਤਿਕਾਰ ਪੈਦਾ ਕੀਤਾ ਉੱਥੇ ਸਮਾਗਮ ਦੀ ਸਫਲਤਾ ਨੇ ਪ੍ਰਬੰਧਕਾਂ ਨੂੰ ਵੀ ਉਤਸ਼ਾਹਿਤ ਕੀਤਾ।
ਮੀਡੀਆ ਸਹਿਯੋਗ
—————————————————————–
(ਅੰਤਰਰਾਸ਼ਟਰੀ ਮਾਂ ਬੋਲੀ ਦਿਹਾੜੇ ਨੂੰ ਸਮਰਪਿਤ)
ਨੌਵਾਂ ਸਮਾਗਮ: ਮਾਲਵਾ ਕਾਲਜ ਬੌਂਦਲੀ, ਸਮਰਾਲਾ ਵਿੱਚ
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ, ਸਕੂਲਾਂ ਅਤੇ ਕਾਲਜਾਂ ਦੇ ਵਿਦਿਆਰਥੀਆਂ ਵਿੱਚ, ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਪ੍ਰਤੀ ਦਿਲਚਸਪੀ ਪੈਦਾ ਕਰਨ ਲਈ ਸ਼ੁਰੂ ਕੀਤੀ ਗਈ ਸਮਾਗਮਾਂ ਦੀ ਲੜੀ ਦਾ ਨੌਵਾਂ ਸਮਾਗਮ ਮਾਲਵਾ ਕਾਲਜ ਬੌਂਦਲੀ, ਸਮਰਾਲਾ ਵਿੱਚ ਕੀਤਾ ਗਿਆ।
ਪੰਜਾਬੀ ਭਾਸ਼ਾ ਵਿਚ ਸਾਹਿਤ ਸਿਰਜਣ, ਇਸ ਦੇ ਸ਼ੁੱਧ ਉਚਾਰਨ, ਪੰਜਾਬੀ ਵਿੱਚ ਸੁੰਦਰ ਲਿਖਾਈ ਅਤੇ ਗਾਇਨ ਕਰਨ ਵਿੱਚ ਪਹਿਲੀ ਥਾਂ ਪ੍ਰਾਪਤ ਕਰਨ ਵਾਲੀਆਂ ਪੰਜ ਵਿਦਿਅਰਥਣਾਂ ਨਵਜੋਤ ਕੌਰ, ਰਜਿੰਦਰ ਕੌਰ, ਅਨਮੋਲ ਕੌਰ, ਜਸ਼ਨਪ੍ਰੀਤ ਕੌਰ ਅਤੇ ਜੀਵਨਜੋਤ ਕੌਰ ਅਤੇ ਵਿਦਿਆਰਥੀ ਸੁਖਪ੍ਰੀਤ ਸਿੰਘ ਨੂੰ ਭਾਈਚਾਰੇ ਵੱਲੋਂ ਮੈਡਲ, ਸਨਮਾਨ ਪੱਤਰ, ਪੁਸਤਕਾਂ ਦੇ ਸੈੱਟ ਅਤੇ ਬੈਗ ਨਾਲ ਸਨਮਾਨਿਤ ਕੀਤਾ ਗਿਆ।
ਇੱਕਲੇ ਇੱਕਲੇ ਵਿਦਿਆਰਥੀ ਦੇ ਸਨਮਾਨ ਦੇ ਯਾਦਗਾਰੀ ਪਲ
ਵਿਦਿਆਰਥਣ ਜਸ਼ਨਪ੍ਰੀਤ ਕੌਰ ਦਾ ਆਪਣੀ ਮਾਂ ਬੋਲੀ ਪੰਜਾਬੀ ਲਈ ਮੋਹ ਅਤੇ ਸਮਰਪਣ
ਸਖ਼ਤ ਮਿਹਨਤ ਕਰਕੇ ਇਸ ਜਸ਼ਨਪ੍ਰੀਤ ਕੌਰ ਨੇ ਪੰਜਾਬੀ ਦੇ ਅੱਖ਼ਰਾਂ ਨੂੰ ਮੋਤੀਆਂ ਵਾਂਗ ਚਿਣਨ ਵਿੱਚ ਮੁਹਾਰਤ ਹਾਸਲ ਕਰ ਲਈ ਹੈ।
ਉਸਦੀ ਕਲਾ ਦਾ ਨਮੂਨਾ।
ਜਸ਼ਨਪ੍ਰੀਤ ਦਾ ਹੌਸਲਾ ਵਧਾਉਣ ਲਈ ਮੀਡੀਆ ਵੱਲੋਂ ਭਰਪੂਰ ਸਹਿਯੋਗ
ਪ੍ਰਧਾਨਗੀ ਮੰਡਲ ਵਿਚ ਸ਼ਸ਼ੋਭਿਤ ਹਨ ਪ੍ਰਿੰਸੀਪਲ ਹਰਿੰਦਰ ਕੌਰ, ਨਿਰਮਲ ਸਿੰਘ ਔਟਵਾ, ਮਿੱਤਰ ਸੈਨ ਮੀਤ ਅਤੇ ਸੁਖਇੰਦਰਪਾਲ ਸਿੰਘ
ਵਿਦਿਆਰਥੀ
‘ਅੰਤਰਰਾਸ਼ਟਰੀ ਮਾਤ ਭਾਸ਼ਾ ਦਿਹਾੜਾ ਮਨਾਉਣ ਦਾ ਮਹੱਤਵ’:
ਇਸ ਵਿਸ਼ੇ ਤੇ ਕੀਤੀ ਗਈ ਸੰਖੇਪ ਗੱਲਬਾਤ ਵਿੱਚ ਪ੍ਰੋਫੈਸਰ ਅਮਨਪ੍ਰੀਤ ਕੌਰ ਵੱਲੋਂ ‘ਇਸ ਦਿਹਾੜੇ ਦੇ ਇਤਿਹਾਸਿਕ ਪਿਛੋਕੜ‘, ਮਿੱਤਰ ਸੈਨ ਮੀਤ ਵੱਲੋਂ ‘ਮਾਂ ਬੋਲੀ ਪੰਜਾਬੀ ਦੀ ਪੰਜਾਬ ਵਿੱਚ ਵਰਤਮਾਨ ਸਥਿਤੀ‘, ਕੈਨੇਡਾ ਤੋਂ ਆਏ ਨਿਰਮਲ ਸਿੰਘ ਵੱਲੋਂ ‘ਕੈਨੇਡਾ ਵਿੱਚ ਪੰਜਾਬੀ ਦੀ ਉਤਸ਼ਾਹਜਨਕ ਸਥਿਤੀ‘ ਅਤੇ ਸੁਖਿੰਦਰ ਪਾਲ ਸਿੰਘ ਸਿੱਧੂ ਵੱਲੋਂ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਸੰਸਥਾ ਵੱਲੋਂ ਪੰਜਾਬੀ ਦੇ ਵਿਕਾਸ ਅਤੇ ਪਸਾਰ ਲਈ ਚੁੱਕੇ ਜਾ ਰਹੇ ਠੋਸ ਕਦਮਾਂ ਅਤੇ ਹੋਈਆਂ ਪ੍ਰਾਪਤੀਆਂ ਦਾ ਜ਼ਿਕਰ ਕੀਤਾ। ਕਾਲਜ ਦੇ ਪੰਜਾਬੀ ਵਿਭਾਗ ਦੇ ਮੁਖੀ ਪ੍ਰੋਫੈਸਰ ਹਰਿੰਦਰਜੀਤ ਸਿੰਘ ਕਲੇਰ ਅਤੇ ਪ੍ਰਿੰਸੀਪਲ ਡਾਕਟਰ ਹਰਿੰਦਰ ਕੌਰ ਵੱਲੋਂ ਵਿਦਿਆਰਥੀਆਂ ਨੂੰ ਮਾਂ ਬੋਲੀ ਪੰਜਾਬੀ ਨਾਲ ਜੁੜੇ ਰਹਿਣ ਲਈ ਪ੍ਰੇਰਿਆ ਗਿਆ।
ਵਿਦਿਆਰਥੀਆਂ ਦੇ ਨਾਲ ਨਾਲ, ਵਿਦਿਆਰਥੀਆਂ ਨੂੰ ਪੰਜਾਬੀ ਭਾਸ਼ਾ ਨਾਲ ਜੋੜਨ ਵਾਲੇ ਅਧਿਆਪਕਾਂ ਪ੍ਰੋ ਹਰਜਿੰਦਰਜੀਤ ਸਿੰਘ ਕਲੇਰ, ਪ੍ਰਿੰਸੀਪਲ ਹਰਿੰਦਰ ਕੌਰ ਅਤੇ ਪ੍ਰੋ ਅਮਨਪ੍ਰੀਤ ਕੌਰ ਦਾ ਵੀ ਭਾਈਚਾਰੇ ਵਲੋਂ ਸਨਮਾਨ ਕੀਤਾ ਗਿਆ।
ਕਾਲਜ ਵਲੋਂ ਵੀ ਆਏ ਮਹਿਮਾਨਾਂ ਦਾ ਸਤਿਕਾਰ ਕੀਤਾ ਗਿਆ।
ਸਮਾਗਮ ਦੀ ਰੂਹੇ ਰਵਾਂ ਪ੍ਰੋ ਅਮਨਪ੍ਰੀਤ ਕੌਰ
——————————————————————————————
aaaa
ਅੱਠਵਾਂ ਸਨਮਾਨ ਸਮਾਗਮ –ਮਹੰਤ ਲਛਮਣ ਦਾਸ ਸੀਨੀਅਰ ਸੈਕੰਡਰੀ ਸਕੂਲ ਤਲਵੰਡੀ ਕਲਾਂ ਵਿੱਚ
—————————————————-
CBSE ਨਾਲ ਸੰਬੰਧਿਤ ਮਹੰਤ ਲਛਮਣ ਦਾਸ ਸੀਨੀਅਰ ਸੈਕੰਡਰੀ ਸਕੂਲ ਤਲਵੰਡੀ ਕਲਾਂ ਵਿੱਚ
ਜਿੱਥੇ ਬਾਰਵੀਂ ਜ਼ਮਾਤ ਤੱਕ, ਹਿੰਦੀ ਦੀ ਥਾਂ, ਪੰਜਾਬੀ ਭਾਸ਼ਾ ਲਾਜ਼ਮੀ ਵਿਸ਼ੇ ਦੇ ਤੌਰ ਤੇ ਪੜਾਈ ਜਾਂਦੀ ਹੈ
ਜਿੱਥੇ ਇੱਕ ਪਾਸੇ ਕਾਰਪੋਰੇਟ ਘਰਾਨਿਆਂ ਵੱਲੋਂ ਸਥਾਪਿਤ ਅਤੇ ਕੇਂਦਰੀ ਸਿੱਖਿਆ ਬੋਰਡਾਂ ਨਾਲ ਸੰਬੰਧਿਤ ਸਕੂਲਾਂ ਵਿੱਚ ਪੰਜਾਬੀ ਨੂੰ ਨਫ਼ਰਤ ਕਰਨੀ ਸਿਖਾਈ ਜਾਂਦੀ ਹੈ ਉੱਥੇ ਦੂਜੇ ਪਾਸੇ ਸਧਾਰਨ ਵਿਅਕਤੀਆਂ ਵੱਲੋਂ ਆਪਣੇ ਸੀਮਿਤ ਸਾਧਨਾ ਨਾਲ ਸਥਾਪਤ ਅਜਿਹੇ ਸਕੂਲ ਵੀ ਨਜ਼ਰ ਆਉਂਦੇ ਹਨ ਜਿੱਥੇ ਪੰਜਾਬ ਚਿੰਤਨ, ਪੰਜਾਬੀ ਭਾਸ਼ਾ, ਸਾਹਿਤ ਅਤੇ ਸਭਿਆਚਾਰ ਨੂੰ ਵਿਕਸਿਤ ਕਰਨ ਲਈ ਸਿਰ ਤੋੜ ਯਤਨ ਹੋ ਰਹੇ ਹਨ।
ਲੁਧਿਆਣਾ ਜ਼ਿਲ੍ਹੇ ਦੇ ਪਛੜੇ ਹੋਏ ਬੇਟ (ਸਿੱਧਵਾਂ) ਇਲਾਕੇ ਦੇ ਛੋਟੇ ਜਿਹੇ ਕਸਬੇ ਤਲਵੰਡੀ ਕਲਾਂ ਵਿੱਚ ਸਥਿਤ ਇਹੋ ਜਿਹਾ ਇੱਕ ਸਕੂਲ ਹੈ ਐਮ ਐਲ ਡੀ ਸੀਨੀਅਰ ਸੈਕੰਡਰੀ ਸਕੂਲ। ਇਸ ਸਕੂਲ ਦੀ ਖਾਸੀਅਤ ਇਹ ਹੈ ਕਿ CBSE. ਨਾਲ ਸੰਬੰਧਿਤ ਹੋਣ ਦੇ ਬਾਵਜੂਦ ਇਸ ਸਕੂਲ ਵਿੱਚ ਬਾਰਵੀਂ ਜ਼ਮਾਤ ਤੱਕ ਹਿੰਦੀ ਦੀ ਥਾਂ ਪੰਜਾਬੀ ਭਾਸ਼ਾ ਇਕ ਲਾਜ਼ਮੀ ਵਿਸ਼ੇ ਦੇ ਤੌਰ ਤੇ ਪੜ੍ਹਾਈ ਜਾਂਦੀ ਹੈ ਅਤੇ ਹਿੰਦੀ ਬੀ ਕੋਰਸ (optional) ਦੇ ਤੌਰ ਤੇ।
ਪੰਜਾਬੀ ਭਾਸ਼ਾ ਦੇ ਹੱਕ ਵਿੱਚ ਚੁੱਕੇ ਇਸ ਇਨਕਲਾਬੀ ਕਦਮ ਦਾ ਸਿਹਰਾ ਸਕੂਲ ਦੇ ਸੰਸਥਾਪਕ, ਮਾਲਕ ਅਤੇ ਪ੍ਰਿੰਸੀਪਲ ਬਲਦੇਵ ਬਾਵਾ ਜੀ ਦੇ ਸਿਰ ਬੱਝਦਾ ਜਦਾ ਹੈ।
ਇਸ ਸਕੂਲ ਦੀ ਇਸੇ ਵਿਸ਼ੇਸ਼ਤਾ ਤੋਂ ਪ੍ਰਭਾਵਿਤ ਹੋ ਕੇ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ, ਸਕੂਲਾਂ ਅਤੇ ਕਾਲਜਾਂ ਦੇ ਵਿਦਿਆਰਥੀਆਂ ਵਿੱਚ, ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਦਿਲਚਸਪੀ ਪੈਦਾ ਕਰਨ ਲਈ ਸ਼ੁਰੂ ਕੀਤੀ ਗਈ ਸਮਾਗਮਾਂ ਦੀ ਲੜੀ ਦਾ ਅਠਵਾਂ ਸਮਾਗਮ 3 ਫਰਵਰੀ, ਨੂੰ ਇਸੇ ਸਕੂਲ ਵਿੱਚ ਰੱਖਿਆ ਗਿਆ।
ਸਮਾਗਮ ਦਾ ਪਹਿਲਾ ਸਨਮਾਨ (ਪੱਖ)
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ, ਸਕੂਲਾਂ ਅਤੇ ਕਾਲਜਾਂ ਦੇ ਵਿਦਿਆਰਥੀਆਂ ਵਿੱਚ, ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਦਿਲਚਸਪੀ ਪੈਦਾ ਕਰਨ ਲਈ ਸਮਾਗਮਾਂ ਦੀ ਇਕ ਲੜੀ ਸ਼ੁਰੂ ਕੀਤੀ ਗਈ ਹੈ। ਇਸ ਯੋਜਨਾ ਅਧੀਨ ਇਸ ਸਕੂਲ ਦੇ ਸਾਹਿਤ ਸਿਰਜਣ, ਗਾਇਨ, ਸ਼ੁੱਧ ਉਚਾਰਣ, ਸੁੰਦਰ ਲਿਖਾਈ ਆਦਿ ਵਿਚ ਪਹਿਲੇ ਨੰਬਰ ਤੇ ਆਉਣ ਵਾਲੇ 6 ਵਿਦਿਆਰਥੀਆਂ ਤੇਜ ਵੀਰ ਕੌਰ (ਬਾਰਵੀਂ), ਗੁਰਸ਼ੀਨ ਕੌਰ (ਬਾਰਵੀਂ), ਗੁਰਪ੍ਰੀਤ ਸਿੰਘ (ਬਾਰਵੀਂ), ਸੁਖਮਨਦੀਪ ਕੌਰ (ਗਿਆਰਵੀਂ), ਮਹਿਕ ਪ੍ਰੀਤ ਕੌਰ (ਅੱਠਵੀਂ) ਅਤੇ ਈਸ਼ਵਰ ਪਾਲ ਸਿੰਘ (ਛੇਵੀਂ) ਨੂੰ ਭਾਈਚਾਰੇ ਵੱਲੋਂ ਸਕੂਲ ਬੈਗਾਂ, ਮੈਡਲਾਂ, ਉੱਤਮ ਪੁਸਤਕਾਂ, ਪੈਂਤੀ ਅੱਖਰੀ ਕਲਿਪ ਬੋਰਡਾਂ ਅਤੇ ਪ੍ਰਮਾਣ-ਪੱਤਰਾਂ ਨਾਲ ਸਨਮਾਨਿਤ ਕੀਤਾ ਗਿਆ ।
ਇੱਕਲੇ ਇੱਕਲੇ ਵਿਦਿਆਰਥੀ ਦਾ ਸਨਮਾਨ
ਬਲਦੇਵ ਬਾਵਾ ਜੀ ਵੱਲੋਂ ਮਾਂ ਬੋਲੀ ਪੰਜਾਬੀ ਦੇ ਵਿਕਾਸ ਅਤੇ ਪਸਾਰ ਲਈ ਚੁੱਕੇ ਦਲੇਰਾਨਾ ਕਦਮਾਂ ਨੇ ਵਿਸ਼ਵ ਭਰ ਦੇ ਪੰਜਾਬੀ ਜਗਤ ਵਿੱਚ ਆਪਣੀ ਵਿਸ਼ੇਸ਼ ਥਾਂ ਬਣ ਲਈ ਹੈ। ਉਨਾਂ ਦੀਆਂ ਇੰਨ੍ਹਾਂ ਸੇਵਾਵਾਂ ਨੂੰ ਨਮਨ ਕਰਦੇ ਹੋਏ ਭਾਈਚਾਰੇ ਦੀਆਂ ਕੈਨੇਡਾ ਅਤੇ ਪੰਜਾਬ ਇਕਾਈਆਂ ਵੱਲੋਂ ਉਨਾਂ ਦਾ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ।
ਸਮਾਗਮ ਦਾ ਦੂਜਾ (ਕਲਾ ਪ੍ਰਦਰਸ਼ਨ ਅਤੇ ਚਿੰਤਨ) ਪੱਖ
ਪ੍ਰਧਾਨਗੀ ਮੰਡਲ: ਜਿਸ ਵਿੱਚ ਸ਼ਾਮਿਲ ਹਨ ਬਲਦੇਵ ਬਾਬਾ, ਮਿੱਤਰ ਸੈਨ ਮੀਤ, ਦਵਿੰਦਰ ਸਿੰਘ ਸੇਖਾ, ਜਸਵਿੰਦਰ ਸਿੰਘ ਗਰਚਾ, ਸੁਖਿੰਦਰ ਪਾਲ ਸਿੰਘ ਸਿੱਧੂ ਅਤੇ ਅਮਰੀਕ ਸਿੰਘ ਤਲਵੰਡੀ
ਉਤਸ਼ਾਹ ਨਾਲ ਭਰੇ ਸੈਂਕੜੇ ਵਿਦਿਆਰਥੀ
ਵਿਦਿਆਰਥੀ ਆਪਣੀ ਆਪਣੀ ਕਲਾ ਦਾ ਪ੍ਰਗਟਾਵਾ ਕਰਦੇ ਹੋਏ
‘ਨੌਜਵਾਨਾਂ ਵਿਚ ਪੰਜਾਬੀ ਭਾਸ਼ਾ ਪੜ੍ਹਨ ਦੀ ਰੂਚੀ ਕਿਵੇਂ ਪੈਦਾ ਕੀਤੀ ਜਾਵੇ?’ ਇਸ ਵਿਸ਼ੇ ਤੇ, ਸੰਖੇਪ ਵਿੱਚ, ਵਿਚਾਰ ਵਟਾਂਦਰਾ ਕੀਤਾ ਗਿਆ ਜਿਸ ਵਿਚ ਜਸਵਿੰਦਰ ਸਿੰਘ ਗਰਚਾ (ਕੈਨੇਡਾ), ਮਿੱਤਰ ਸੈਨ ਮੀਤ, ਬਲਦੇਵ ਬਾਵਾ ਅਤੇ ਅਮਰੀਕ ਸਿੰਘ ਤਲਵੰਡੀ ਨੇ ਹਿੱਸਾ ਲਿਆ।
ਸਕੂਲ ਵੱਲੋਂ, ਆਏ ਮਹਿਮਾਨਾਂ ਦਾ ਭਰਪੂਰ ਸਵਾਗਤ
ਸਕੂਲ ਦੇ ਪ੍ਰਿੰਸੀਪਲ ਸਾਹਿਬ ਅਤੇ ਸਟਾਫ਼ ਨਾਲ, ਸਾਰੇ ਮਹਿਮਾਨਾਂ ਦੀ ਯਾਦਗਾਰੀ ਗਰੁੱਪ ਫ਼ੋਟੋ
ਇਸ ਸਮਾਗਮ ਦੀ ਸਫ਼ਲਤਾ ਲਈ ਦਿਨ ਰਾਤ ਇੱਕ ਕਰਨ ਵਾਲੇ ਸਕੂਲ ਦੇ ਅਧਿਆਪਕਾਂ ਅਤੇ ਅਧਿਕਾਰੀਆਂ ਨਾਲ ਮਹਿਮਾਨਾਂ ਦੀ ਯਾਦਗਾਰੀ ਤਸਵੀਰ
ਸਮਾਗਮ ਨੂੰ ਬਹੁਤ ਹੀ ਖ਼ੂਬਸੂਰਤੀ ਨਾਲ ਚਲਵਾਉਣ ਵਾਲੇ -ਅਧਿਆਪਕਾ ਰਮਨਦੀਪ ਕੌਰ
ਨਵੀਂ ਸਿੱਖਿਆ ਨੀਤੀ 2022 ਬਾਰੇ, ਪ੍ਰਿੰਸੀਪਲ ਸਾਹਿਬ ਦੇ ਦਫਤਰ ਵਿੱਚ ਵਿਚਾਰ ਵਟਾਂਦਰਾ ਕਰਦੇ ਹੋਏ ਭਾਈਚਾਰੇ ਦੇ ਕਾਰਕੁਨ
ਮੀਡੀਆ ਦਾ ਵੱਡੇ ਪੱਧਰ ਤੇ ਸਹਿਯੋਗ
——————————————–
ਸੱਤਵਾਂ ਸਮਾਗਮ: ਸਕੂਲ ਆਫ ਐਮੀਨੈਂਸ ਭਸੋੜ
————————————-
ਸਕੂਲੀ ਵਿਦਿਆਰਥੀਆਂ ਨੂੰ ਪੰਜਾਬੀ ਭਾਸ਼ਾ ਨਾਲ ਜੋੜਨ ਦੇ ਉਪਰਾਲੇ ਵਜੋਂ
ਸੱਤਵਾਂ ਸਮਾਗਮ ਸਕੂਲ ਆਫ਼ ਐਮੀਨੈਂਸ ਭਸੌੜ ਵਿੱਚ ਆਯੋਜਿਤ
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ, 76ਵੇਂ ਗਣਤੰਤਰ ਦਿਵਸ (26 ਜਨਵਰੀ) ਤੇ, ਬੱਚਿਆਂ ਵਿੱਚ ਪੰਜਾਬੀ ਭਾਸ਼ਾ ਪ੍ਰਤੀ ਰੁਚੀ ਪੈਦਾ ਕਰਨ ਦੇ ਉਦੇਸ਼ ਨਾਲ ਆਰੰਭੀ ਗਈ ਸਮਾਗਮਾਂ ਦੀ ਲੜੀ ਦਾ ਸੱਤਵਾਂ ਸਮਾਗਮ , ਸਿਪਾਹੀ ਜਸਵੰਤ ਸਿੰਘ ਸਕੂਲ ਆਫ਼ ਐਮੀਨੈਂਸ ਪਿੰਡ ਭਸੌੜ, ਧੂਰੀ ਵਿੱਚ ਕੀਤਾ ਗਿਆ।
ਸਮਾਗਮ ਦਾ ਪਹਿਲਾ (ਸਨਮਾਨ) ਪੱਖ
ਇਸ ਸਕੂਲ ਦੇ ਸਾਹਿਤ-ਸਿਰਜਣ, ਪੰਜਾਬੀ ਸ਼ੁੱਧ ਉਚਾਰਨ, ਗਾਇਨ ਅਤੇ ਸੁੰਦਰ ਲਿਖਾਈ ਲਈ ਸਕੂਲ ਦੇ 6 ਵਿਦਿਆਰਥੀਆਂ ਰਣਦੀਪ ਕੌਰ (ਮਿਡਲ ਵਿਭਾਗ) , ਰੋਸ਼ਨ ਲਾਲ ਤਿਵਾੜੀ (ਮਿਡਲ ਵਿਭਾਗ) , ਜਗਵੀਰ ਸਿੰਘ ਕੈਂਥ (ਹਾਈ ਵਿਭਾਗ), ਸਿਮਰਨ ਕੌਰ (ਹਾਈ ਵਿਭਾਗ), ਨਫੀਸਾ਼ ਅਲੀ (ਸੈਕੰਡਰੀ ਵਿਭਾਗ) ਅਤੇ ਅੰਜੂ ਰਾਣੀ (ਸੈਕੰਡਰੀ ਵਿਭਾਗ) ਦਾ ਪ੍ਰਮਾਣ ਪੱਤਰਾਂ , ਮੈਡਲਾਂ , ਪੰਜਾਬੀ ਪੈਂਤੀ ਅਖਰੀ ਕਲਿਪ ਬੋਰਡਾਂ , ਸਕੂਲ ਬੈਗਾਂ ਅਤੇ ਜਾਣਕਾਰੀ ਭਰਪੂਰ ਕਿਤਾਬਾਂ ਦੇ ਸੈੱਟਾਂ ਦੇ ਨਾਲਸਨਮਾਨ ਕੀਤਾ ਗਿਆ।
ਕਵਿਤਾ ਸਿਰਜਣ ਵਿਚ ਹੱਥ ਅਜਮਾਉਣ ਵਾਲੇ ਜਸਵੀਰ ਸਿੰਘ, ਅਨਿਕੇਤ ਸਿੰਘ, ਕਰਨਵੀਰ ਸਿੰਘ ਦਾ ਵੀ ਵਿਸ਼ੇਸ਼ ਸਨਮਾਨ ਕੀਤਾ ਗਿਆ।
ਇੱਕਲਾ ਇੱਕਲਾ ਵਿਦਿਆਰਥੀ ਸਨਮਾਨ ਪ੍ਰਾਪਤ ਕਰਦੇ ਹੋਏ
ਸਕੂਲ ਅਤੇ ਗਰਾਮ ਪੰਚਾਇਤ ਵਲੋਂ ਵੀ ਭਾਈਚਾਰੇ ਦੇ ਕਾਰਕੂਨਾਂ ਦਾ ਭਰਵਾਂ ਸਤਿਕਾਰ ਕੀਤਾ ਗਿਆ
ਭਾਈਚਾਰੇ ਵਲੋਂ ਇਸ ਉਪਰਾਲੇ ਦੀ ਰੂਹੇ ਰਵਾਂ ਪ੍ਰਿੰਸੀਪਲ ਅਰਜਿੰਦਰ ਪਾਲ ਸਿੰਘ ਨੂੰ ਵੀ ਸਤਿਕਾਰਤ ਕੀਤਾ ਗਿਆ।
ਸਕੂਲ ਵਲੋਂ ਗਰਾਮ ਪੰਚਾਇਤ ਅਤੇ ਭਾਈਚਾਰਾ ਟੀਮ ਦਾ ਸਵਾਗਤ
ਸਮਾਗਮ ਦਾ ਦੂਜਾ (ਕਲਾ ਪ੍ਰਦਰਸ਼ਨ ਅਤੇ ਚਿੰਤਨ) ਪੱਖ
ਗੈਰ ਰਸਮੀ ਪ੍ਰਧਾਨਗੀ ਮੰਡਲ
ਉਤਸ਼ਾਹ ਨਾਲ ਭਰੇ ਵਿਦਿਆਰਥੀ
ਵਿਦਿਆਰਥੀ ਆਪਣੀ ਆਪਣੀ ਕਲਾ ਦੇ ਜੌਹਰ ਦਿਖਾਉਂਦੇ ਹੋਏ
ਮਾਂ ਬੋਲੀ ਦੀ ਮਹੱਤਤਾ ਅਤੇ ਇਸ ਨੂੰ ਪੇਸ਼ ਚੁਨੌਤੀਆਂ ਬਾਰੇ ਜਾਣਕਾਰੀ ਦਿੰਦੇ ਹੋਏ ਪ੍ਰਿੰਸੀਪਲ ਅਰਜਿੰਦਰ ਪਾਲ ਸਿੰਘ, ਮਿੱਤਰ ਸੈਨ ਮੀਤ ਅਤੇ ਮੂਲ ਚੰਦ ਸ਼ਰਮਾ
ਸਮਾਗਮ ਨੂੰ ਸੁਚੱਜਤਾ ਨਾਲ ਚਲਾਉਣ ਵਾਲੇ ਮੈਡਮ ਨੀਲਮ ਜਿੰਦਲ
—————————————————————————–
ਛੇਵਾਂ ਸਮਾਗਮ – ਸਰਕਾਰੀ ਸੀਨੀਅਰ ਸਕੈਡੰਰੀ ਸਕੂਲ ਅਯਾਲੀ ਖੁਰਦ
———————————————–
ਹੁਣ ਸਰਕਾਰੀ ਸਕੂਲਾਂ ਵਿੱਚ ਪ੍ਰਵਾਸੀਆਂ ਨੂੰ ਪੜਨੀ ਪੈ ਰਹੀ ਹੈ ਪੰਜਾਬੀ
————————-
ਇਹ ਸਿੱਟਾ ਸਰਕਾਰੀ ਸੀਨੀਅਰ ਸਕੈਡੰਰੀ ਸਕੂਲ ਅਯਾਲੀ ਖੁਰਦ ‘ਚ ਕਰਵਾਏ ਛੇਵੇਂ ਸਮਾਗਮ ਚੋਂ ਨਿਕਲਿਆ
ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਅਯਾਲੀ ਖ਼ੁਰਦ ਵਿੱਚ 1300 ਦੇ ਕਰੀਬ ਵਿਦਿਆਰਥੀ ਹਨ। ਲੁਧਿਆਣਾ ਸ਼ਹਿਰ ਦੀ ਹੱਦ ਦੇ ਨਾਲ ਲੱਗਦਾ ਹੋਣ ਕਾਰਨ ਸਕੂਲ ਵਿੱਚ ਅੱਧੇ ਤੋਂ ਵੱਧ ਵਿਦਿਆਰਥੀ ਪ੍ਰਵਾਸੀ ਪਰਿਵਾਰਾਂ ਦੇ ਹਨ। ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਸਿੱਖਿਆ ਦਾ ਮਾਧਿਅਮ ਪੰਜਾਬੀ ਹੈ। ਹਰ ਜ਼ਮਾਤ ਵਿੱਚ ਪੰਜਾਬੀ ਭਾਸ਼ਾ ਦੀ ਪੜ੍ਹਾਈ ਲਾਜ਼ਮੀ ਵਿਸ਼ੇ ਦੇ ਤੌਰ ਤੇ ਵੀ ਕਰਵਾਈ ਜਾਂਦੀ ਹੈ।
ਇਸ ਲਈ ਪ੍ਰਵਾਸੀ ਵਿਦਿਆਰਥੀਆਂ ਦਾ ਕੰਮ ਚਲਾਊ ਪੰਜਾਬੀ ਸਿੱਖ ਕੇ ਪੂਰਾ ਨਹੀਂ ਪੈਂਦਾ। ਇਮਤਿਹਾਨ ਵਿੱਚ ਉੱਚੀ ਪੁਜੀਸ਼ਨ ਪ੍ਰਾਪਤ ਕਰਨ ਲਈ ਉਨਾਂ ਨੂੰ, ਹਰ ਪੱਧਰ ਤੇ, ਪੰਜਾਬੀ ਭਾਸ਼ਾ ਤੇ ਪਕੜ ਮਜ਼ਬੂਤ ਕਰਨੀ ਪੈਂਦੀ ਹੈ।
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰੇ ਦੀ ਜਗਰਾਉਂ ਇਕਾਈ ਦੇ ਸੰਚਾਲਕ ਸ੍ਰ ਅਵਤਾਰ ਸਿੰਘ ਨੇ ਸਾਰੀ ਉਮਰ ਸਕੂਲਾਂ ਵਿੱਚ ਨਿਠ ਕੇ ਪੰਜਾਬੀ ਪੜ੍ਹਾਈ ਹੀ ਨਹੀਂ ਸਗੋਂ ਪੰਜਾਬੀ ਵਿੱਚ ਉੱਚ ਪੱਧਰ ਦਾ ਸਾਹਿਤ ਵੀ ਰਚਿਆ ਹੈ। ਅੱਸੀਵਿਆਂ ਨੂੰ ਢੁੱਕ ਕੇ ਵੀ ਉਹ ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਲਈ ਮੋਹਰੀ ਸਫ਼ਾਂ ਵਿੱਚ ਰਹਿ ਕੇ ਕੰਮ ਕਰਦੇ ਹਨ।
ਅਯਾਲੀ ਸਕੂਲ ਦੀ ਪ੍ਰਿੰਸੀਪਲ ਕੰਵਲਜੋਤ ਕੌਰ ਉਨਾਂ ਦੀ ਬੇਟੀ ਹੈ। ਪ੍ਰਿੰਸੀਪਲ ਸਾਹਿਬਾ ਨੂੰ ਪੰਜਾਬੀ ਪ੍ਰਤੀ ਮੋਹ ਗੁੜ੍ਹਤੀ ਵਿੱਚ ਮਿਲਿਆ ਹੈ। ਆਪਣੇ ਵਿਦਿਆਰਥੀਆਂ ਨੂੰ ਪੰਜਾਬੀ ਭਾਸ਼ਾ, ਸਾਹਿਤ ਅਤੇ ਸੱਭਿਆਚਾਰਕ ਸਰਗਰਮੀਆਂ ਲਈ ਉਤਸਾਹਿਤ ਕਰਕੇ ਉਹ ਆਪਣੀ ਗੁੜ੍ਹਤੀ ਦਾ ਪੂਰਾ ਮੁੱਲ ਉਤਾਰ ਰਹੇ ਹਨ।
ਪੰਜਾਬੀ ਅਧਿਆਪਕਾ ਜਸਰੀਨ ਕੌਰ ਪੰਜਾਬੀ ਸੱਭਿਆਚਾਰ ਨੂੰ ਪੂਰੀ ਤਰ੍ਹਾਂ ਸਮਰਪਤ ਹਨ। ਉਨਾਂ ਦੀ ਸੁਚੱਜੀ ਅਗਵਾਈ ਵਿੱਚ ਵਿਦਿਆਰਥੀ ਦਿਨ ਦੁਗਣੀ ਅਤੇ ਰਾਤ ਚੌਗਣੀ ਤਰੱਕੀ ਕਰ ਰਹੇ ਹਨ।
ਖੁਸ਼ੀ ਵਾਲੀ ਗੱਲ ਇਹ ਹੈ ਕਿ ਅਜਿਹੀਆਂ ਸਖਸ਼ੀਅਤਾਂ ਦੀ ਅਗਵਾਹੀ ਵਿਚ ਪੰਜਾਬੀਆਂ ਦੇ ਨਾਲ ਨਾਲ ਪਰਵਾਸੀ ਪਰਿਵਾਰਾਂ ਦੇ ਵਿਦਿਆਰਥੀ ਵੀ ਪੰਜਾਬੀ ਵਿੱਚ ਮੁਹਾਰਤ ਹਾਸਲ ਕਰਦੇ ਜਾ ਰਹੇ ਹਨ ਅਤੇ ਪੰਜਾਬੀ ਦੇ ਭਵਿੱਖ ਨੂੰ ਉੱਜਲ ਕਰ ਰਹੇ ਹਨ।
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ ਪੰਜਾਬੀ ਭਾਸ਼ਾ ਪ੍ਰਤੀ ਬੱਚਿਆਂ ਵਿੱਚ ਰੁਚੀ ਪੈਦਾ ਕਰਨ ਦੇ ਉਦੇਸ਼ ਨਾਲ ਆਰੰਭੀ ਗਈ ਸਮਾਗਮਾਂ ਦੀ ਲੜੀ ਦਾ ਛੇਵਾਂ ਸਮਾਗਮ, ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਅਯਾਲੀ ਖ਼ੁਰਦ ਵਿੱਚ ਕੀਤਾ ਗਿਆ।
ਸਮਾਗਮ ਦਾ ਪ੍ਰਬੰਧ ਲਾਇਬਰੇਰੀ ਵਿੱਚ ਕੀਤਾ ਗਿਆ ਸੀ। ਹਾਲ ਵਿਦਿਆਰਥੀਆਂ ਨਾਲ ਖਚਾਖਚ ਭਰਿਆ ਹੋਇਆ ਸੀ।
ਵਿਦਿਆਰਥੀਆਂ ਨੂੰ ਪੰਜਾਬੀ ਪੜਨੀ ਕਿਉਂ ਜਰੂਰੀ ਇਸ ਵਿਸ਼ੇ ਤੇ ਅਵਤਾਰ ਸਿੰਘ ਦਵਿੰਦਰ ਸਿੰਘ ਘਟੌੜਾ ਅਤੇ ਪ੍ਰੋਫੈਸਰ ਇੰਦਰਪਾਲ ਸਿੰਘ ਨੇ ਜਾਣਕਾਰੀ ਦਿੱਤੀ।
ਪੁਰਸਕਾਰ ਜੇਤੂ ਵਿਦਿਆਰਥੀਆਂ ਨੇ ਆਪਣੀ ਆਪਣੀ ਕਲਾ ਦੇ ਜੌਹਰ ਵੀ ਦਿਖਾਏ।
ਸਾਹਿਤ-ਸਿਰਜਣ, ਪੰਜਾਬੀ ਸ਼ੁੱਧ ਉਚਾਰਨ, ਗਾਇਨ ਅਤੇ ਸੁੰਦਰ ਲਿਖਾਈ ਲਈ ਸਕੂਲ ਦੇ ਨੌ ਵਿਦਿਆਰਥੀਆਂ, ਹਰਸ਼ਿਤਾ (ਬਾਰਵੀਂ), ਅੰਜਲੀ (ਬਾਰਵੀਂ), ਨਰਿੰਦਰ ਸਿੰਘ (ਬਾਰਵੀਂ), ਹੁਨਰਪ੍ਰੀਤ ਕੌਰ (ਗਿਆਰਵੀਂ), ਭਵਨਜੋਤ ਕੌਰ (ਦਸਵੀਂ), ਪੁਸ਼ਪਿੰਦਰ ਕੌਰ (ਦਸਵੀਂ), ਅਮਰਿੰਦਰ ਸਿੰਘ (ਦਸਵੀਂ), ਅੰਸ਼ਪ੍ਰੀਤ ਕੌਰ (ਦਸਵੀਂ) ਅਤੇ ਜਸਮੀਤ ਕੌਰ (ਸੱਤਵੀਂ) ਨੂੰ ਭਾਈਚਾਰੇ ਵੱਲੋਂ ਸਕੂਲ ਬੈਗ, ਗੁਰਮੁੱਖੀ ਵਰਨਮਾਲਾ ਅੰਕਿਤ ਫੱਟੀਆਂ, ਪੁਸਤਕਾਂ ਅਤੇ ਪ੍ਰਮਾਣ ਪੱਤਰਾਂ ਨਾਲ ਸਨਮਾਨਿਤ ਕੀਤਾ ਗਿਆ।
ਇਕਲੇ ਇਕਲੇ ਵਿਦਿਆਰਥੀ ਦੇ ਸਨਮਾਨ ਦੇ ਯਾਦਗਾਰੀ ਪਲ
ਵਿਦਿਆਰਥੀਆਂ ਵਿੱਚ ਮਾਂ ਬੋਲੀ ਪੰਜਾਬੀ ਦਾ ਦੀਵਾ ਜਗਾਉਣ ਲਈ ਪ੍ਰਿੰਸੀਪਲ ਕੰਵਲਜੋਤ ਕੌਰ ਅਤੇ ਪੰਜਾਬੀ ਅਧਿਆਪਕਾ ਜਸਰੀਨ ਕੌਰ ਦਾ ਵੀ ਭਾਈਚਾਰੇ ਵੱਲੋਂ ਸਤਿਕਾਰ ਕੀਤਾ ਗਿਆ।
ਪ੍ਰਿੰਸੀਪਲ ਕੰਵਲਜੋਤ ਕੌਰ ਦਾ ਸਤਿਕਾਰ
ਪੰਜਾਬੀ ਅਧਿਆਪਕਾ ਜਸਰੀਨ ਕੌਰ ਦਾ ਸਤਿਕਾਰ
ਦੋਹਾਂ ਸਖਸ਼ੀਅਤਾਂ ਦੇ ਸਤਿਕਾਰ ਦਾ ਯਾਦਗਾਰੀ ਪਲ
ਸਟੇਜ ਦੀ ਜਿੰਮੇਵਾਰੀ ਜਸਰੀਨ ਕੌਰ ਵਲੋਂ ਬਾਖੂਬੀ ਨਿਭਾਈ ਗਈ।
ਦਵਿੰਦਰ ਸਿੰਘ ਘਟੌੜਾ (ਕੈਨੇਡਾ), ਅਵਤਾਰ ਸਿੰਘ, ਮਿੱਤਰ ਸੈਨ ਮੀਤ, ਮਹਿੰਦਰ ਸਿੰਘ ਸੇਖੋਂ, ਦਵਿੰਦਰ ਸੇਖਾ, ਸੁਖਇੰਦਰ ਪਾਲ ਸਿੰਘ ਅਤੇ ਪ੍ਰੋਫੈਸਰ ਇੰਦਰਪਾਲ ਸਿੰਘ ਨੇ ਭਾਈਚਾਰੇ ਦੀ ਪ੍ਰਤੀਨਿਧਤਾ ਕੀਤੀ।
ਸਕੂਲ ਵਲੋਂ ਆਏ ਮਮਿਾਨਾਂ ਦਾ ਵੀ ਸਨਮਾਨ ਕੀਤਾ ਗਿਆ
ਅਖੀਰ ਵਿੱਚ ਪ੍ਰਿੰਸੀਪਲ ਕਵੰਲਜੋਤ ਕੌਰ ਵੱਲੋਂ ਆਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਗਿਆ।
ਮੁੱਖ ਮਹਿਮਾਨ ਸਨ ਉਦਯੋਗਪਤੀ ਸ੍ਰੀ ਬਿਹਾਰੀ ਲਾਲ ਜੀ।
ਮੀਡੀਆ ਦਾ ਸਹਿਯੋਗ
———————————————————
ਪੰਜਵਾਂ ਸਮਾਗਮ -ਗੁਰੂ ਨਾਨਕ ਪਬਲਿਕ ਸੀਨੀਅਰ ਸਕੈਡੰਰੀ ਸਕੂਲ ਬੱਸੀਆਂ
ਪੰਜਾਬ ਦੇ ਪੇਂਡੂ ਖੇਤਰਾਂ ਵਿੱਚ ਸਥਿਤ ਨਿੱਜੀ ਸਕੂਲ ਪੰਜਾਬ ਅਧਿਆਤਮਕ ਚਿੰਤਨ, ਪੰਜਾਬੀ ਭਾਸ਼ਾ ਅਤੇ ਸੱਭਿਆਚਾਰ ਨੂੰ ਪਹੁੰਚਾ ਰਹੇ ਹਨ ਅਸਮਾਨੀ
————————————————-
ਇਹ ਸਿੱਟਾ ਗੁਰੂ ਨਾਨਕ ਪਬਲਿਕ ਸੀਨੀਅਰ ਸਕੈਡੰਰੀ ਸਕੂਲ ਬੱਸੀਆਂ ‘ਚ ਕਰਵਾਏ ਪੰਜਵੇਂ ਸਮਾਗਮ ‘ਚੋਂ ਨਿਕਲਿਆ
———————————
ਜਿੱਥੇ ਇੱਕ ਪਾਸੇ ਕਾਰਪੋਰੇਟ ਘਰਾਨਿਆਂ ਵੱਲੋਂ ਸਥਾਪਿਤ ਅਤੇ ਕੇਂਦਰੀ ਸਿੱਖਿਆ ਬੋਰਡਾਂ ਨਾਲ ਸੰਬੰਧਿਤ ਸਕੂਲਾਂ ਵਿੱਚ ਪੰਜਾਬੀ ਨੂੰ ਨਫ਼ਰਤ ਕਰਨੀ ਸਿਖਾਈ ਜਾਂਦੀ ਹੈ ਉੱਥੇ ਦੂਜੇ ਪਾਸੇ ਸਧਾਰਨ ਵਿਅਕਤੀਆਂ ਵੱਲੋਂ ਆਪਣੇ ਸੀਮਿਤ ਸਾਧਨਾ ਨਾਲ ਸਥਾਪਤ ਅਜਿਹੇ ਸਕੂਲ ਵੀ ਨਜ਼ਰ ਆਉਂਦੇ ਹਨ ਜਿੱਥੇ ਪੰਜਾਬ ਚਿੰਤਨ, ਪੰਜਾਬੀ ਭਾਸ਼ਾ, ਸਾਹਿਤ ਅਤੇ ਸਭਿਆਚਾਰ ਨੂੰ ਵਿਕਸਿਤ ਕਰਨ ਲਈ ਸਿਰ ਤੋੜ ਯਤਨ ਹੋ ਰਹੇ ਹਨ।
ਲੁਧਿਆਣਾ ਜ਼ਿਲ੍ਹੇ ਦੇ ਛੋਟੇ ਜਿਹੇ ਕਸਬੇ ਬਸੀਆਂ ਵਿੱਚ ਸਥਿਤ ਇਹੋ ਜਿਹਾ ਇੱਕ ਸਕੂਲ ਹੈ ਗੁਰੂ ਨਾਨਕ ਪਬਲਿਕ ਸੀਨੀਅਰ ਸੈਕੰਡਰੀ ਸਕੂਲ। ਪੰਜਾਬ ਸਕੂਲ ਸਿੱਖਿਆ ਬੋਰਡ ਨਾਲ ਸੰਬੰਧਿਤ ਹੋਣ ਕਾਰਨ ਇਸ ਸਕੂਲ ਦੇ ਵਿਦਿਆਰਥੀਆਂ ਨੂੰ ਪਹਿਲੀ ਤੋਂ ਲੈ ਕੇ ਦਸਵੀਂ ਜਮਾਤ ਤੱਕ ਪੰਜਾਬੀ ਲਾਜਮੀ ਵਿਸ਼ੇ ਦੇ ਤੌਰ ਤੇ ਪੜ੍ਹਾਈ ਜਾਂਦੀ ਹੈ। ਸਿੱਖਿਆ ਦਾ ਮਾਧਿਅਮ ਪੰਜਾਬੀ ਵੀ ਹੈ ਅਤੇ ਅੰਗਰੇਜ਼ੀ ਵੀ।
ਸਕੂਲ ਵਿੱਚ ਹਰ ਮਹੀਨੇ Quiz ਮੁਕਾਬਲੇ ਕਰਵਾਏ ਜਾਂਦੇ ਹਨ। ਮੁਕਾਬਲਿਆਂ ਵਿੱਚ ਲੁਪਤ ਹੋ ਰਹੇ ਠੇਠ ਪੰਜਾਬੀ ਸ਼ਬਦਾਂ, ਪੁਰਾਣੇ ਖੇਤੀ ਔਜਾਰਾਂ ਅਤੇ ਖਾਲਸਾਈ ਸ਼ਬਦਾਂ ਆਦਿ ਨਾਲ ਸਬੰਧਤ ਪ੍ਰਸ਼ਨ ਪੁੱਛੇ ਜਾਂਦੇ ਹਨ। ਸੱਭਿਆਚਾਰਕ ਵਿਰਸੇ ਨਾਲ ਜੋੜਨ ਲਈ ਵਿਦਿਆਰਥੀਆਂ ਨੂੰ ਕਵੀਸ਼ਰੀਆਂ, ਵਾਰਾਂ ਗਾਉਣੀਆਂ, ਅਤੇ ਅਧਿਆਤਮ ਨਾਲ ਜੋੜਨ ਲਈ ਕੀਰਤਨ ਕਰਨੇ ਸਿਖਾਏ ਜਾਂਦੇ ਹਨ।
ਇਹ ਸਭ ਅੱਖੀਂ ਦੇਖਣ ਦੇ ਉਦੇਸ਼ ਨਾਲ ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ, ਸਕੂਲਾਂ ਅਤੇ ਕਾਲਜਾਂ ਦੇ ਵਿਦਿਆਰਥੀਆਂ ਵਿੱਚ, ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਦਿਲਚਸਪੀ ਪੈਦਾ ਕਰਨ ਲਈ ਸ਼ੁਰੂ ਕੀਤੀ ਗਈ ਸਮਾਗਮਾਂ ਦੀ ਲੜੀ ਦਾ ਪੰਜਵਾਂ ਸਮਾਗਮ 22 ਨਵੰਬਰ, ਨੂੰ ਇਸੇ ਸਕੂਲ ਵਿੱਚ ਰੱਖਿਆ ਗਿਆ।
ਜੋ ਸੁਣਿਆ ਸੀ ਉਸ ਤੋਂ ਕਿਤੇ ਵੱਧ ਅੱਖੀਂ ਦੇਖਿਆ।
ਸਕੂਲ ਦੇ ਪੰਜਾਬੀ ਸਾਹਿਤ ਸਿਰਜਣ, ਗਾਇਨ, ਸ਼ੁੱਧ ਉਚਾਰਣ, ਸੁੰਦਰ ਲਿਖਾਈ ਆਦਿ ਵਿਚ ਪਹਿਲੇ ਨੰਬਰ ਤੇ ਆਉਣ ਵਾਲੇ ਛੇ ਵਿਦਿਆਰਥੀਆਂ (ਹਰਨੂਰ ਕੌਰ, ਹਰਮਨ ਕੌਰ ਹਠੂਰ,ਪੰਕਜ ਕੁਮਾਰ, ਗੁਰਬੀਰ ਕੌਰ, ਜਸਪ੍ਰੀਤ ਕੌਰ ਅਤੇ ਹਰਪਲਖੁਸ਼ ਨੂਰ ਕੌਰ) ਨੂੰ ਭਾਈਚਾਰੇ ਵੱਲੋਂ ਉੱਤਮ ਪੁਸਤਕਾਂ, ਪੈਂਤੀ ਅੱਖਰੀ ਫ਼ੱਟੀਆਂ ਅਤੇ ਪ੍ਰਮਾਣ-ਪੱਤਰਾਂ ਨਾਲ ਸਨਮਾਨਿਤ ਕੀਤਾ ਗਿਆ।
‘ ਨੌਜਵਾਨਾਂ ਵਿਚ ਪੰਜਾਬੀ ਭਾਸ਼ਾ ਪੜ੍ਹਨ ਦੀ ਰੁਚੀ ਕਿਵੇਂ ਪੈਦਾ ਕੀਤੀ ਜਾਵੇ ?’ ਇਸ ਵਿਸ਼ੇ ਤੇ ਸੰਖੇਪ ਵਿਚਾਰ ਵਟਾਂਦਰੇ ਵਿੱਚ ਮਿੱਤਰ ਸੈਨ ਮੀਤ, ਅਮਰੀਕ ਸਿੰਘ ਤਲਵੰਡੀ ਅਤੇ ਬਲਵੀਰ ਕੌਰ ਰਾਏਕੋਟੀ ਨੇ ਆਪਣੇ ਆਪਣੇ ਵਿਚਾਰ ਰੱਖੇ।
ਭਾਈਚਾਰੇ ਦੇ ਸੰਚਾਲਕ ਮੂਲ ਚੰਦ ਸ਼ਰਮਾ ਅਤੇ ਜਸਵਿੰਦਰ ਸਿੰਘ ਛਿੰਦਾ ਨੇ ਦੂਰੋਂ ਆ ਕੇ ਹਾਜ਼ਰੀ ਲਗਵਾਈ। ਮੂਲ ਚੰਦ ਸ਼ਰਮਾ ਜੀ ਨੇ ਮਾਂ ਬੋਲੀ ਦਾ ਗੁਣਗਾਨ ਕਰਦਾ ਆਪਣਾ ਗੀਤ ਸੁਣਾਇਆ।
ਵਿਦਿਆਰਥੀਆਂ ਨੇ ਪੰਜਾਬੀ ਭਾਸ਼ਾ ਤੇ ਆਪਣੀ ਪਕੜ ਦੇ ਜੌਹਰ ਦਿਖਾਏ।
ਬਲਵੀਰ ਕੌਰ ਰਾਏਕੋਟੀ ਵਲੋਂ ਆਪਣੇ ਵਲੋਂ ਸੰਪਾਦਿਤ ਦੋ ਬਾਲ ਪੁਸਤਕਾਂ ਵੀ ਲੋਕ ਅਰਪਣ ਕੀਤੀਆਂ ਗਈਆਂ।
ਸਮਾਗਮ ਦੀ ਪ੍ਰਧਾਨਗੀ ਸਕੂਲ ਦੇ ਡਾਇਰੈਕਟਰ ਸ੍ਰ ਮਹਿੰਦਰ ਸਿੰਘ ਬੱਸੀਆਂ ਜੀ ਨੇ ਕੀਤੀ।
ਸਕੂਲ ਦੀ ਫ਼ੇਰੀ ਬਾਅਦ ਯਕੀਨ ਵਜਿਆ ਕਿ ਘੱਟੋ ਘੱਟ ਹਾਲ ਦੀ ਘੜੀ ਤਾਂ ਪੰਜਾਬੀ ਭਾਸ਼ਾ, ਸਹਿਤ ਅਤੇ ਸਭਿਆਚਾਰ ਨੂੰ ਕੋਈ ਖ਼ਤਰਾ ਨਹੀਂ ਹੈ।
——————————-
ਚੌਥਾ ਸਮਾਗਮ -ਸਰਕਾਰੀ ਸਕੈਡੰਰੀ ਸਕੂਲ ਗੋਬਿੰਦਪੁਰ
ਕਨੇਡੀਅਨ ਪੰਜਾਬੀਆਂ ਦੇ ਪੰਜਾਬ ਵਿੱਚ ਪੰਜਾਬੀ ਨੂੰ ਪੁਨਰ ਸਰਜੀਤ ਕਰਨ ਦੇ ਸੁਪਨੇ ਨੂੰ ਬੂਰ ਪੈਣਾ ਸ਼ੁਰੂ
ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਗੋਬਿੰਦਪੁਰ ‘ਚ ਕੀਤੇ ਚੌਥੇ ਸਮਾਗਮ ਚੋਂ ਨਿਕਲਿਆ ਸਿੱਟਾ
ਸੱਲ ਕਲਾਂ ਤਹਿਸੀਲ ਬੰਗਾ ਦਾ ਇੱਕ ਛੋਟਾ ਜਿਹਾ ਪਿੰਡ ਹੈ। ਮੁਸ਼ਕਿਲ ਨਾਲ ਚਾਰ ਪੰਜ ਸੌ ਘਰਾਂ ਦਾ। ਇੱਥੋਂ ਦੇ ਸਾਬਕਾ ਧੜੱਲੇਦਾਰ ਸਰਪੰਚ ਦੇ ਪੰਜੋ ਪੁੱਤਰ ਅੱਜ ਕੱਲ ਕਨੇਡਾ ਦੇ ਵਸਨੀਕ ਹਨ। ਇਧਰ ਵਾਂਗ, ਪੰਜਾਂ ਨੇ ਹੱਡ ਭੰਨਵੀਂ ਮਿਹਨਤ ਕਰਕੇ ਉਧਰ ਵੀ ਪੂਰੇ ਸੁੱਖ ਸਾਧਨ ਜੁਟਾ ਲਏ ਹਨ।
ਰੋਟੀ ਟੁੱਕ ਦੇ ਫਿਕਰ ਤੋਂ ਵਿਹਲੇ ਹੋ ਕੇ ਹੁਣ ਸਾਰੇ ਭਰਾਵਾਂ ਨੇ ਆਪਣੇ ਪਿਆਰੇ ਪੰਜਾਬ ਦੇ ਮਸਲਿਆਂ, ਖਾਸ ਕਰ ਇੱਥੋਂ ਹੋ ਰਹੇ ਪੰਜਾਬੀ ਦੇ ਦੇਸ ਨਿਕਾਲੇ ਵੱਲ ਧਿਆਨ ਦੇਣਾ ਸ਼ੁਰੂ ਕੀਤਾ ਹੋਇਆ ਹੈ।
ਪਰਿਵਾਰ ਦੇ ਵੱਡੇ ਮੈਂਬਰ ਕਿਰਪਾਲ ਸਿੰਘ ਗਰਚਾ ਦੀ ਉਸ ਸਮੇਂ ਆਤਮਾ ਬਲੂੰਦਰੀ ਗਈ ਜਦੋਂ ਸਾਲ 2015 ਵਿੱਚ, ਆਪਣੇ ਕਿਸੇ ਨਿਜੀ ਕੰਮ ਲਈ ਉਹ ਮਿਉਂਸੀਪਲ ਕਮੇਟੀ ਬੰਗਾ ਦੇ ਦਫ਼ਤਰ ਗਏ। ਉਨਾਂ ਨੇ ਦੇਖਿਆ ਕਿ ਕਮੇਟੀ ਦੇ ਵਾਹਨਾਂ ਤੇ ਪੰਜਾਬੀ ਵਿੱਚ ਲਿਖੇ ਸ਼ਬਦਾਂ ਨੂੰ ਮਿਟਾ ਕੇ ਹਿੰਦੀ ਲਿਖੀ ਜਾ ਰਹੀ ਹੈ। ਆਪਣਾ ਵਿਰਾਟ ਰੂਪ ਦਿਖਾ ਕੇ ਉਨਾਂ ਨੇ ਕਮੇਟੀ ਦੇ ਅਧਿਕਾਰੀਆਂ ਨਾਲ ਗੱਲ ਕਰਕੇ, ਇਹ ਪੰਜਾਬੀ ਭਾਸ਼ਾ ਵਿਰੋਧੀ ਵਰਤਾਰਾ ਰੋਕਿਆ।
ਕੈਨੇਡਾ ਵਾਪਸ ਜਾ ਕੇ ਉਨਾਂ ਨੇ ਆਪਣੀ ਇਹ ਚਿੰਤਾ ਆਪਣੇ ਸਮਾਜ ਸੇਵੀ ਮਿੱਤਰਾਂ ਨਾਲ ਸਾਂਝੀ ਕੀਤੀ।
ਸੋਚ ਵਿਚਾਰ ਬਾਅਦ ਇਹਨਾਂ ਮਿੱਤਰਾਂ ਨੇ ‘ਪੰਜਾਬ ਵਿੱਚ ਪੰਜਾਬੀ ਨੂੰ ਦਰਪੇਸ਼ ਸਮੱਸਿਆਵਾਂ’ ਨੂੰ ਸਮਝਣ ਅਤੇ ਕਨੇਡਾ ਵਸਦੇ ਪੰਜਾਬੀਆਂ ਵਿੱਚ ਮਾਂ ਬੋਲੀ ਪੰਜਾਬੀ ਪ੍ਰਤੀ ਜਾਗਰੂਕਤਾ ਪੈਦਾ ਕਰਨ ਦੇ ਉਦੇਸ਼ ਨਾਲ ਸਾਲ 2018 ਵਿੱਚ ਕਨੇਡਾ ਦੇ ਚਾਰ ਪੰਜਾਬੀ ਵਸੋਂ ਵਾਲੇ ਵੱਡੇ ਸ਼ਹਿਰਾਂ (ਵੈਨਕੂਵਰ, ਐਡਮਿੰਟਨ, ਕੈਲਗਰੀ ਅਤੇ ਵਿਨੀਪਿਗ) ਵਿੱਚ ਸਮਾਗਮ ਰੱਖੇ। ਉਸ ਸਮਾਗਮ ਵਿੱਚ ਅਮਰੀਕਾ, ਕਨੇਡਾ, ਪਾਕਿਸਤਾਨ ਅਤੇ ਭਾਰਤ ਤੋਂ ਪੰਜਾਬੀ ਭਾਸ਼ਾ ਲਈ ਜ਼ਮੀਨੀ ਪੱਧਰ ਤੇ ਕੰਮ ਕਰਨ ਵਾਲੇ ਕਾਰਕੁਨਾਂ ਨੂੰ ਸੱਦਾ ਦਿੱਤਾ ਗਿਆ। ਪੰਜਾਬ ਤੋਂ ਇਹ ਸਨਮਾਨ ਮਿੱਤਰ ਸੈਨ ਮੀਤ ਅਤੇ ਮਹਿੰਦਰ ਸਿੰਘ ਸੇਖੋਂ ਦੀ ਝੋਲੀ ਪਿਆ।
ਸਮੁੰਦਰ ਮੰਥਨ ਬਾਅਦ ਫ਼ੈਸਲਾ ਹੋਇਆ ਕਿ ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਲਈ ਕੰਮ ਕਰਨ ਲਈ ਇੱਕ ਅਜਿਹੀ ਸੰਸਥਾ ਦੀ ਸਥਾਪਨਾ ਕੀਤੀ ਜਾਵੇ ਜਿਸ ਦੀਆਂ ਜੜ੍ਹਾਂ ਸਾਰੀ ਦੁਨੀਆ ਵਿੱਚ ਹੋਣ। ਇਸ ਸੰਸਥਾ ਨੂੰ ‘ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ’ ਦਾ ਨਾਂ ਦਿੱਤਾ ਗਿਆ। ਪੰਜਾਬ ਵਿੱਚ ਇਸ ਸੰਸਥਾ ਲਈ ਕੰਮ ਕਰਨ ਦੀ ਜਿੰਮੇਵਾਰੀ ਮਿੱਤਰ ਸੈਨ ਮੀਤ ਅਤੇ ਮਹਿੰਦਰ ਸਿੰਘ ਸੇਖੋਂ ਨੂੰ ਸੌਂਪੀ ਗਈ। ਵਿਦੇਸ਼ਾਂ ਵਿੱਚ ਇਕਾਈਆਂ ਸਥਾਪਿਤ ਕਰਨ ਦੀ ਜਿੰਮੇਵਾਰੀ ਕਨੇਡਾ ਦੇ ਸੀਨੀਅਰ ਪੱਤਰਕਾਰ ਸ੍ਰ ਕੁਲਦੀਪ ਸਿੰਘ ਨੂੰ ਦਿੱਤੀ ਗਈ। ਕੁਲਦੀਪ ਸਿੰਘ ਹੋਰਾਂ ਦੇ ਯਤਨਾਂ ਸਦਕਾ ਅੱਜ ਦੁਨੀਆਂ ਦੇ 18 ਦੇਸ਼ਾਂ ਵਿੱਚ 25 ਦੇ ਲਗਭਗ ਸਰਗਰਮ ਇਕਾਈਆਂ ਹਨ।
ਪੰਜਾਬ ਆਉਂਦਿਆਂ ਹੀ ਮਿੱਤਰ ਸੈਨ ਮੀਤ ਅਤੇ ਮਹਿੰਦਰ ਸਿੰਘ ਸੇਖੋਂ ਨੇ 13 ਜ਼ਿਲ੍ਹਿਆਂ ਅਤੇ ਪੰਜ ਤਹਿਸੀਲਾਂ ਵਿੱਚ ਭਾਈਚਾਰੇ ਦੀਆਂ ਇਕਾਈਆਂ ਸਥਾਪਿਤ ਕੀਤੀਆਂ। ਦਿਨ ਰਾਤ ਕੰਮ ਕਰਕੇ, ਪੰਜਾਬ ਵਿੱਚ ਵਸਦੇ ਪੰਜਾਬੀਆਂ ਨੂੰ, ‘ਪੰਜਾਬੀ ਨੂੰ ਦਰਪੇਸ਼ ਅਸਲ ਸਮੱਸਿਆਵਾਂ’ ਬਾਰੇ ਜਾਣੂ ਕਰਵਾਇਆ ਜਾ ਰਿਹਾ ਹੈ। ਇਸ ਜੱਦੋ ਜਹਿਦ ਦੇ ਸਾਰਥਕ ਸਿੱਟੇ ਨਿਕਲ ਰਹੇ ਹਨ। ਇਹਨਾਂ ਸਿੱਟਿਆਂ ਵਿੱਚੋਂ ਸਭ ਤੋਂ ਵੱਧ ਜ਼ਿਕਰਯੋਗ ਹੈ ਪੰਜਾਬ ਦੇ ਨਿੱਜੀ ਸਕੂਲਾਂ ਵਿੱਚ ਪੰਜਾਬੀ ਦੀ ਪੜ੍ਹਾਈ ਨੂੰ ਦਸਵੀਂ ਜਮਾਤ ਤੱਕ ਲਾਜ਼ਮੀ ਕਰਵਾਉਣਾ।
ਇਸੇ ਜਾਗਰੂਕ ਲਹਿਰ ਦੇ ਹਿੱਸੇ ਵਜੋਂ, ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ ਸਕੂਲਾਂ ਅਤੇ ਕਾਲਜਾਂ ਵਿੱਚ ਜਾ ਕੇ ਵਿਦਿਆਰਥੀਆਂ ਨੂੰ ‘ਪੰਜਾਬੀ ਭਾਸ਼ਾ ਸਿੱਖਣੀ ਕਿਉਂ ਜਰੂਰੀ ਹੈ?’ ਵਿਸ਼ੇ ਬਾਰੇ ਜਾਗਰੂਕ ਕਰਨ ਦੇ ਨਾਲ ਨਾਲ ਉਨਾਂ ਵਿਦਿਆਰਥੀਆਂ ਨੂੰ ਵੀ ਉਤਸ਼ਾਹਿਤ/ਸਨਮਾਨਿਤ ਕੀਤਾ ਜਾ ਰਿਹਾ ਹੈ ਜਿਹੜੇ ਪੰਜਾਬੀ ਸਾਹਿਤ ਸਿਰਜਣ, ਸ਼ੁੱਧ ਉਚਾਰਨ, ਗਾਇਨ ਅਤੇ ਸੁੰਦਰ ਲਿਖਾਈ ਰਾਹੀਂ ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਪ੍ਰਸ਼ੰਸਾਯੋਗ ਯੋਗਦਾਨ ਪਾ ਰਹੇ ਹਨ।
ਇਸ ਲੜੀ ਦਾ ਚੌਥਾ ਸਮਾਗਮ ਸਰਕਾਰੀ ਸਕੈਡੰਰੀ ਸਕੂਲ ਗੋਬਿੰਦਪੁਰ ਵਿੱਚ ਕੀਤਾ ਗਿਆ। ਇਹ ਉਹ ਸਕੂਲ ਹੈ ਜਿੱਥੇ ਗਰਚਾ ਪਰਿਵਾਰ ਦੇ ਵਿਚਕਾਰਲੇ ਪੁੱਤਰ ਸ੍ਰ ਸੁਖਦੇਵ ਸਿੰਘ ਗਰਚਾ ਨੇ 1988 ਤੱਕ ਸਾਇੰਸ ਪੜ੍ਹਾਈ। ਉਨਾਂ ਦੇ ਕੁਝ ਵਿਦਿਆਰਥੀ ਇਸ ਸਕੂਲ ਵਿੱਚ ਅਧਿਆਪਕ ਹਨ। ਇਸ ਸਾਂਝ ਕਾਰਨ ਜਿੱਥੇ ਗਰਚਾ ਪਰਿਵਾਰ ਦੀ ਇਸ ਸਕੂਲ ਨਾਲ ਭਾਵਨਾਤਮਿਕ ਸਾਂਝ ਹੈ ਉੱਥੇ ਸਕੂਲ ਦੇ ਅਧਿਆਪਕ ਅਤੇ ਵਿਦਿਆਰਥੀ ਵੀ ਉਹਨਾਂ ਨਾਲ ਅਪਨੱਤ ਰੱਖਦੇ ਹਨ।
ਭਾਈਚਾਰੇ ਦੀ ਕਨੇਡਾ ਅਤੇ ਪੰਜਾਬ ਇਕਾਈ ਦੀ ਸਾਰੀ ਟੀਮ (ਸੁਖਦੇਵ ਸਿੰਘ ਗਰਚਾ, ਮਿੱਤਰ ਸੈਨ ਮੀਤ, ਮਹਿੰਦਰ ਸਿੰਘ ਸੇਖੋ ਅਤੇ ਦਵਿੰਦਰ ਸਿੰਘ ਸੇਖਾ) ਸਮੇਂ ਸਿਰ ਸਕੂਲ ਪਹੁੰਚ ਗਏ। ਸਕੂਲ ਨੂੰ ‘ਵਿਆਹ ਵਾਲੇ ਘਰ’ ਵਾਂਗ ਗੁਬਾਰਿਆਂ ਅਤੇ ਰੰਗੋਲੀਆਂ ਨਾਲ ਸਜ਼ਾਇਆ ਗਿਆ ਸੀ। ਸਕੂਲ ਦੇ ਖੁੱਲੇ ਵੇੜੇ ਅਤੇ ਨਿੱਘੀ ਧੁੱਪ ਵਿੱਚ ਸਮਾਗਮ ਦੀ ਸ਼ੁਰੂਆਤ ਹੋਈ।
ਸਕੂਲ ਦੇ ਵਿਦਿਆਰਥੀਆਂ ਪੁਸ਼ਪਾ (ਸੁੰਦਰ ਲਿਖਾਈ), ਸ਼ਿਬਮ (ਸਾਹਿਤ ਸਿਰਜਣ-ਗੀਤ), ਜੱਸੀ (ਸਾਹਿਤ ਸਿਰਜਣ-ਕਵਿਤਾ), ਰਾਘਵ ਸੁਭਰਾ (ਸ਼ੁੱਧ ਪੰਜਾਬੀ ਉਚਾਰਨ), ਮਨਪ੍ਰੀਤ ਕੌਰ (ਪੰਜਾਬੀ ਵਿਸ਼ੇਸ ਵਿਚ 99% ਅੰਕ ਪ੍ਰਾਪਤ ਕਰਨ) ਅਤੇ ਸ਼ਿਲਪਾ ਨੂੰ (ਕਵਿਤਾ ਉਚਾਰਨ) ਲਈ ਸਨਮਾਨਿਤ ਕੀਤਾ ਜਾਣਾ ਸੀ।
ਪਹਿਲਾਂ ਇਹਨਾਂ ਬੱਚਿਆਂ ਵੱਲੋਂ ਆਪਣੀ ਆਪਣੀ ਕਲਾ ਦੇ ਜੌਹਰ ਦਿਖਾਏ ਗਏ। ਫੇਰ ਸੰਖੇਪ ਵਿੱਚ ਸੁਖਦੇਵ ਸਿੰਘ ਗਰਚਾ, ਮਿੱਤਰ ਸੈਨ ਮੀਤ, ਮਹਿੰਦਰ ਸਿੰਘ ਸੇਖੋ ਅਤੇ ਰਾਜ ਕੁਮਾਰ ਵੱਲੋਂ ਪੰਜਾਬੀ ਦੀ ਪੜ੍ਹਾਈ ਦੀ ਮਹੱਤਤਾ ਬਾਰੇ ਜਾਣਕਾਰੀ ਸਾਂਝੀ ਕੀਤੀ ਗਈ।
ਵਿਦਿਆਰਥੀਆਂ ਨੂੰ ਪੰਜਾਬੀ ਸੱਭਿਆਚਾਰ ਨਾਲ ਜੋੜਨ ਲਈ ਮਾਸਟਰ ਜਸਵੀਰ ਸਿੰਘ ਅਤੇ ਮਾਸਟਰ ਸੁਭਾਸ਼ ਕੁਮਾਰ ਨੂੰ ਵੀ ਭਾਈਚਾਰੇ ਵੱਲੋਂ ਸਨਮਾਨਿਤ ਕੀਤਾ ਗਿਆ। ਸਕੂਲ ਦੀ ਲਾਇਬਰੇਰੀ ਲਈ ਮਿੱਤਰ ਸੈਨ ਮੀਤ ਵੱਲੋਂ ਆਪਣੀਆਂ ਲਿਖੀਆਂ ਪੁਸਤਕਾਂ ਦਾ ਸੈਟ ਪ੍ਰਿੰਸੀਪਲ ਸਾਹਿਬਾ ਨੂੰ ਭੇਂਟ ਕੀਤਾ ਗਿਆ।
ਅਖ਼ੀਰ ਵਿਚ ਸਕੂਲ ਵੱਲੋਂ ਆਪਣੇ ਵਿਹੜੇ ਆਏ ਮਹਿਮਾਨਾਂ ਨੂੰ ਵਿਸ਼ੇਸ਼ ਸਨਮਾਨ ਚਿੰਨ ਦੇ ਕੇ ਮਾਨ ਬਖਸ਼ਿਆ ਗਿਆ।
ਆਰਟਿਸਟ ਬੱਚੇ
ਮਿੱਤਰ ਸੈਨ ਮੀਤ ਵਲੋਂ ਸਕੂਲ ਦੀ ਲਾਇਬਰੇਈ ਲਈ ਆਣੀਆਂ ਪੁਸਤਕਾਂ ਦਾ ਸੈਟ ਪ੍ਰਿੰਸੀਪਲ ਸਾਹਿਬਾ ਨੂੰ ਭੇਂਟ ਕੀਤਾ ਗਿਆ।
ਫੋਟੋਆਂ ਖਿੱਚਣ ਅਤੇ ਰਿਕਾਰਡਿੰਗ ਦੀ ਜਿੰਮੇਵਾਰੀ ਦਵਿੰਦਰ ਸਿੰਘ ਸੇਖਾ ਵੱਲੋਂ ਨਿਭਾਈ ਗਈ।
————————————————-
ਤੀਜਾ ਸਮਾਗਮ –ਬੀ.ਸੀ.ਐਮ . ਸਕੂਲ ਲੁਧਿਆਣਾ
ਨਿਜੀ ਪਬਲਿਕ ਸਕੂਲਾਂ ਵਿੱਚ ਵੀ ਪੜ੍ਹਾਈ ਜਾ ਰਹੀ ਹੈ ਪੰਜਾਬੀ
ਬੀ.ਸੀ.ਐਮ . ਸਕੂਲ ਲੁਧਿਆਣਾ ਵਿੱਚ ਕਰਵਾਏ ਗਏ ਤੀਜੇ ਸਮਾਗਮ ‘ ਚ ਨਿਕਲਿਆ ਸਿੱਟਾ
ਸਾਲ 2018 ਤੱਕ ਪਬਲਿਕ ਸਕੂਲਾਂ ਵਿੱਚ ਪੰਜਾਬੀ ਦੀ ਪੜ੍ਹਾਈ ਕਰਾਉਣਾ ਤਾਂ ਦੂਰ ਪੰਜਾਬੀ ਬੋਲਣ ਤੱਕ ਤੇ ਪਾਬੰਦੀ ਤੱਕ ਲੱਗੀ ਹੋਈ ਸੀ। ਸਕੂਲਾਂ ਵਿੱਚ ਪੰਜਾਬੀ ਬੋਲਣ ਵਾਲੇ ਬੱਚਿਆਂ ਨੂੰ ਜ਼ੁਰਮਾਨੇ ਤੱਕ ਕੀਤੇ ਜਾਂਦੇ ਸਨ।
ਪੰਜਾਬ ਸਰਕਾਰ ਵੱਲੋਂ ਸਾਲ 2008 ਵਿੱਚ ਇੱਕ ਕਾਨੂੰਨ (ਪੰਜਾਬ ਪੰਜਾਬੀ ਅਤੇ ਹੋਰ ਭਾਸ਼ਾਵਾਂ ਸਿੱਖਿਆ ਕਾਨੂੰਨ) ਬਣਾਇਆ ਗਿਆ ਸੀ ਜਿਸ ਰਾਹੀਂ ਇਹ ਵਿਵਸਥਾ ਕੀਤੀ ਗਈ ਸੀ ਕਿ ਪੰਜਾਬ ਵਿੱਚ ਸਥਿਤ ਹਰ ਸਕੂਲ (ਨਿੱਜੀ ਅਤੇ ਸਰਕਾਰੀ) ਨੂੰ ਪਹਿਲੀ ਤੋਂ ਦਸਵੀਂ ਜ਼ਮਾਤ ਤੱਕ ਦੇ ਵਿਦਿਆਰਥੀਆਂ ਨੂੰ ਪੰਜਾਬੀ ਭਾਸ਼ਾ ਦੀ ਪੜ੍ਹਾਈ ਲਾਜ਼ਮੀ ਵਿਸ਼ੇ ਦੇ ਤੌਰ ਤੇ ਕਰਵਾਉਣੀ ਜ਼ਰੂਰੀ ਹੋਵੇਗੀ।
ਸਾਲ 2018 ਤੱਕ ਨਿੱਜੀ ਸਕੂਲਾਂ ਵੱਲੋਂ ਇਸ ਕਾਨੂੰਨ ਨੂੰ ਪੂਰੀ ਤਰ੍ਹਾਂ ਨਜ਼ਰ ਅੰਦਾਜ਼ ਕੀਤਾ ਜਾਂਦਾ ਰਿਹਾ।
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰੇ ਦੇ ਸਿਰ ਤੋੜ ਯਤਨਾਂ ਸਦਕਾ, ਅਖ਼ੀਰ ਪੰਜਾਬ ਸਰਕਾਰ ਵੱਲੋਂ ਮਿਤੀ 21.01.2019 ਨੂੰ ਹੁਕਮ ਜਾਰੀ ਕਰਕੇ ਨਿੱਜੀ ਸਕੂਲਾਂ ਦੇ ਪ੍ਰਬੰਧਕਾਂ ਨੂੰ, ਇਸ ਕਾਨੂੰਨ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਦੀ ਹਦਾਇਤ ਕੀਤੀ ਗਈ।
ਇਸ ਕਾਨੂੰਨ ਅਤੇ ਹੁਕਮ ਨੂੰ ਜ਼ਮੀਨੀ ਪੱਧਰ ਤੇ ਲਾਗੂ ਕਰਵਾਉਣ ਲਈ ਭਾਈਚਾਰੇ ਵੱਲੋਂ ਪੈਰਵਾਈ ਜਾਰੀ ਰੱਖੀ ਗਈ।
ਨਤੀਜ਼ੇ ਵੱਜੋਂ, ਅੱਜ ਪੰਜਾਬ ਦੇ ਹਰ ਨਿੱਜੀ ਪਬਲਿਕ ਸਕੂਲ ਵਿੱਚ ਪੰਜਾਬੀ ਦੀ ਪੜ੍ਹਾਈ ਦੇ ਨਾਲ ਨਾਲ ਬੱਚਿਆਂ ਵਿੱਚ ਪੰਜਾਬੀ ਵਿੱਚ ਸਾਹਿਤ ਸਿਰਜਣ, ਸ਼ੁੱਧ ਉਚਾਰਨ ਅਤੇ ਸੁੰਦਰ ਲਿਖਾਈ ਦੇ ਨਾਲ ਨਾਲ ਸੱਭਿਆਚਾਰਕ ਸਰਗਰਮੀਆਂ ਵਿੱਚ ਰੁਚੀਆਂ ਪੈਦਾ ਕਰਨ ਲਈ ਯਤਨ ਹੋਣ ਲੱਗ ਪਏ ਹਨ।
16 ਅਕਤੂਬਰ 2024 ਨੂੰ ਦਿੱਲੀ ਪਬਲਿਕ ਸਕੂਲ ਲੁਧਿਆਣਾ ਵੱਲੋਂ ਵਿਦਿਆਰਥੀਆਂ ਵਿੱਚ ਰਚਨਾਤਮਿਕ ਪ੍ਰਤਿਭਾਵਾਵਾਂ ਨੂੰ ਵਿਕਸਿਤ ਕਰਨ ਲਈ ‘ਵਾਗਮਿਤਾ’ ਨਾਂ ਹੇਠ ਇਕ ਅੰਤਰ ਸਕੂਲ ਮੁਕਾਬਲਾ ਕਰਵਾਇਆ ਗਿਆ। ਮੁਕਾਬਲੇ ਵਿੱਚ ਹਿੱਸਾ ਲੈਣ ਵਾਲੇ ਬੱਚਿਆਂ ਨੇ ਦਿੱਤੇ ਇੱਕ ਵਿਸ਼ੇ ਤੇ ਮੌਕੇ ਤੇ ਕਹਾਣੀ ਲਿਖਣੀ ਸੀ, ਕਵਿਤਾ ਉਚਾਰਨ ਅਤੇ ਲੋਕ ਗੀਤ ਗਾਇਨ ਕਰਨਾ ਸੀ। 15 ਵਿੱਚੋਂ 13 ਸਕੂਲਾਂ ਦੇ 59 ਵਿਦਿਆਰਥੀਆਂ ਨੇ ਇਸ ਮੁਕਾਬਲੇ ਵਿੱਚ ਹਿੱਸਾ ਲਿਆ।
ਮਿੱਤਰ ਸੈਨ ਮੀਤ ਨੂੰ ਇਸ ਸਮਾਗਮ ਵਿੱਚ ਬਤੌਰ ਜੱਜ ਹਾਜ਼ਰੀ ਲਗਵਾਉਣ ਦਾ ਸੁਭਾਗ ਪ੍ਰਾਪਤ ਹੋਇਆ।
ਸਾਰੇ ਬੱਚਿਆਂ ਦੀ ਪੇਸ਼ਕਾਰੀ ਦਾ ਮਿਆਰ ਲਗਭਗ ਇੱਕੋ ਜਿਹਾ ਸੀ। ਕਿਸ ਵਿਦਿਆਰਥੀ ਨੂੰ ਪਹਿਲੇ ਨੰਬਰ ਤੇ ਰੱਖਿਆ ਜਾਵੇ ਅਤੇ ਕਿਸ ਨੂੰ ਦੂਜੇ ਨੰਬਰ ਤੇ, ਇਹ ਫ਼ੈਸਲਾ ਕਰਨਾ ਬਹੁਤ ਮੁਸ਼ਕਿਲ ਸੀ।
ਇਸ ਦੁਬਿਧਾ ਨੂੰ ਹੱਲ ਕਰਨ ਲਈ ਭਾਈਚਾਰੇ ਵੱਲੋਂ ਫੈਸਲਾ ਕੀਤਾ ਗਿਆ ਕਿ ਮੁਕਾਬਲੇ ਵਿੱਚ ਪਹਿਲੇ ਦੂਜੇ ਨੰਬਰ ਤੇ ਰਹਿਣ ਵਾਲੇ ਵਿਦਿਆਰਥੀਆਂ ਦੇ ਨਾਲ ਨਾਲ ਮੁਕਾਬਲੇ ਵਿੱਚ ਹਿੱਸਾ ਲੈਣ ਵਾਲੇ ਹਰ ਵਿਦਿਆਰਥੀ ਨੂੰ, ਉਸਦੇ ਸਕੂਲ ਵਿੱਚ ਜਾ ਕੇ ਭਾਈਚਾਰੇ ਵੱਲੋਂ ਵੀ ਸਨਮਾਨਿਤ/ਉਤਸ਼ਾਹਿਤ ਕੀਤਾ ਜਾਵੇ।
BCM ਬਸੰਤ ਐਵਨਿਊ ਲੁਧਿਆਣਾ ਸਕੂਲ ਦੇ ਤਿੰਨ ਬੱਚਿਆਂ ਨੇ ਇਸ ਮੁਕਾਬਲੇ ਵਿੱਚ ਹਿੱਸਾ ਲਿਆ ਸੀ। ਵਧੀਆ ਕਹਾਣੀ ਲਿਖਣ ਲਈ ਇਸ ਸਕੂਲ ਦੀ ਵਿਦਿਆਰਥਣ ਦੂਜੇ ਨੰਬਰ ਤੇ ਰਹੀ ਸੀ।
ਜਦੋਂ ਇਹ ਵਿਚਾਰ ਇਸ ਸਕੂਲ ਦੀ ਤਾਲਮੇਲ (co-coordinator) ਅਧਿਆਪਕਾ ਨਾਲ ਸਾਂਝਾ ਕੀਤਾ ਗਿਆ ਤਾਂ ਉਹਨਾਂ ਨੇ ਭਾਈਚਾਰੇ ਨੂੰ ਜਾਣਕਾਰੀ ਦਿੱਤੀ ਕਿ ਦਿੱਲੀ ਪਬਲਿਕ ਸਕੂਲ ਦੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੇ ਬੱਚਿਆਂ ਦੇ ਪੱਧਰ ਦੇ ਉਨ੍ਹਾਂ ਕੋਲ ਬੀਸੀਆਂ ਬੱਚੇ ਹਨ। ਉਹਨਾਂ ਮੰਗ ਕੀਤੀ ਕਿ ਦਿੱਲੀ ਪਬਲਿਕ ਸਕੂਲ ਦੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣ ਵਾਲੇ ਬੱਚਿਆਂ ਦੇ ਪੱਧਰ ਦੇ ਘੱਟੋ ਘੱਟ 16 ਬੱਚਿਆਂ ਨੂੰ ਭਾਈਚਾਰੇ ਵੱਲੋਂ ਜ਼ਰੂਰ ਉਤਸ਼ਾਹਿਤ ਕੀਤਾ ਜਾਵੇ। ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਦੇ ਹਿਤ ਵਿੱਚ ਹੋਣ ਕਾਰਨ ਭਾਈਚਾਰੇ ਵੱਲੋਂ ਤੁਰੰਤ ਇਹ ਮੰਗ ਪ੍ਰਵਾਨ ਕਰਨ ਲਈ ਗਈ।
ਸਮਾਗਮ ਬਾਲ ਦਿਵਸ ਵਾਲੇ ਦਿਨ, 14 ਨਵੰਬਰ ਨੂੰ ਰੱਖਿਆ ਗਿਆ। ਖਚਾ ਖਚ ਭਰੇ ਹਾਲ ਵਿੱਚ ਬੱਚਿਆਂ ਨੇ ਠੇਠ ਪੰਜਾਬੀ ਵਿੱਚ ਆਪਣੀਆਂ ਲਿਖੀਆਂ ਕਵਿਤਾਵਾਂ ਦੇ ਪਾਠ ਕਰਨ ਦੇ ਨਾਲ ਨਾਲ ਉੱਚ ਪੱਧਰ ਦੀਆਂ ਹੋਰ ਕਵਿਤਾਵਾਂ ਦਾ ਉਚਾਰਨ ਵੀ ਬਾਖ਼ੂਬੀ ਕੀਤਾ।
ਭਾਈਚਾਰੇ ਦੇ ਸੰਚਾਲਕਾਂ ਮਿੱਤਰ ਸੈਨ ਮੀਤ ਅਤੇ ਪ੍ਰੋਫੈਸਰ ਇੰਦਰਪਾਲ ਸਿੰਘ ਨੇ ‘ਪਬਲਿਕ ਸਕੂਲਾਂ ਵਿੱਚ ਮਾਂ ਬੋਲੀ ਦੀ ਮਹੱਤਤਾ’ ਬਾਰੇ ਸੰਖੇਪ ਵਿੱਚ ਜਾਣਕਾਰੀ ਸਾਂਝੀ ਕੀਤੀ।
ਪੰਜਾਬੀ ਭਾਸ਼ਾ ਦਾ ਝੰਡਾ ਬੁਲੰਦ ਕਰਨ ਵਾਲੇ 16 ਵਿਦਿਆਰਥੀਆਂ ਨੂੰ ਉੱਤਮ ਸਾਹਿਤਿਕ ਪੁਸਤਕਾਂ, 35 ਅੱਖਰੀ ਫੱਟੀ ਅਤੇ ਪ੍ਰਮਾਣ ਪੱਤਰਾਂ ਨਾਲ ਸਨਮਾਨਿਤ ਕੀਤਾ ਗਿਆ।
ਵਧੀਆ ਕਹਾਣੀ ਲਿਖਣ ਦਾ ਸਨਮਾਨ ਗੁਰਨਾਮ ਕੌਰ ਨੂੰ ਪ੍ਰਾਪਤ ਹੋਇਆ। ਕਵਿਤਾ ਉਚਾਰਨ ਵਿੱਚ (ਹਰਕੀਰਤ ਸਿੰਘ, ਅਨੰਨਿਆ ਅਤੇ ਜਸਮਾਈਨ ਕੌਰ ਦੀ ਜੋੜੀ, ਅਰਸ਼ਪ੍ਰੀਤ ਕੌਰ ਅਤੇ ਜਸਜੋਤ ਸਿੰਘ ਨੇ) ਆਪਣੀ ਕਲਾ ਦੇ ਜ਼ੋਹਰ ਦਿਖਾਏ। ਜਸਜੋਤ ਸਿੰਘ ਨੇ ਆਪਣੀ ਲਿਖੀ ਖੂਬਸੂਰਤ ਕਵਿਤਾ ਆਪ ਪੇਸ਼ ਕੀਤੀ।
ਇਸ ਸਮਾਗਮ ਨੇ ਆਮ ਲੋਕਾਂ ਵਿੱਚ ਫੈਲੀ ਇਸ ਧਾਰਨਾ ਨੂੰ ਕਿ ਪੰਜਾਬ ਦੇ ਪਬਲਿਕ ਸਕੂਲਾਂ ਵਿੱਚ ਪੰਜਾਬੀ ਪੜ੍ਹਨ ਅਤੇ ਬੋਲਣ ਤੇ ਪਾਬੰਦੀ ਹੈ ਨੂੰ ਝੂਠਾ ਸਾਬਤ ਕੀਤਾ।
—————————————————————-
ਦੂਜਾ ਸਮਾਗਮ –ਸਰਕਾਰੀ ਸਕੈਡੰਰੀ ਸਕੂਲ ਕਰਮਗੜ੍ਹ
ਸਕੂਲਾਂ ਕਾਲਜਾਂ ਵਿੱਚ ਸ਼ੁਰੂ ਕੀਤੇ ਸਮਾਗਮਾਂ ਦੀ ਲੜੀ ਦੇ ਦੂਜੇ ਸਮਾਗਮ ਵਿੱਚ
ਸਾਹਿਤ ਸਿਰਜਣ ਦੀ ਪਹਿਲਾਂ ਹੀ ਜਗਦੀ ਜੋਤ ਨੂੰ ਹੋਰ ਪ੍ਰਚੰਡ ਕਰਨ ਵਿੱਚ ਮਿਲੀ ਸਫ਼ਲਤਾ
ਨਿਰੋਲ ਪੇਂਡੂ ਪਿੱਠ ਭੂਮੀ ਵਾਲੇ ਸਰਕਾਰੀ ਸਕੈਡੰਰੀ ਸਕੂਲ ਕਰਮਗੜ੍ਹ ਵਿੱਚ, ਆਲੇ ਦੁਆਲੇ ਦੇ ਕਰੀਬ ਅੱਧੀ ਦਰਜਨ ਪਿੰਡਾਂ ਦੇ, ਲਗਭਗ 300 ਬੱਚੇ ਸਿੱਖਿਆ ਪ੍ਰਾਪਤ ਕਰਦੇ ਹਨ। ਖੁਸ਼ੀ ਦੀ ਗੱਲ ਹੈ ਕਿ ਵਿਦਿਆਰਥੀਆਂ ਦੇ ਸਰਬਪੱਖੀ ਵਿਕਾਸ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣ ਵਾਲੇ ਸਹਿਤ ਸਿਰਜਨ ਵਰਗ ਦੀ ਵਾਗ ਡੋਰ, ਸਾਹਿਤਕ ਖ਼ੇਤਰ ਵਿੱਚ ਆਪਣੀਆਂ ਪੈੜਾਂ ਪੱਕੀਆਂ ਕਰ ਚੁੱਕੀ ਅਧਿਆਪਕਾ ਅੰਜਨਾ ਮੈਨਨ ਦੇ ਹੱਥ ਹੈ।
ਜਮਾਤ ਵਿੱਚ ਉਹਨਾਂ ਦਾ ਪਹਿਲਾ ਕੰਮ ਬੱਚਿਆਂ ਨੂੰ ਕਵਿਤਾ, ਕਹਾਣੀ ਅਤੇ ਲੇਖ ਲਿਖਣ ਲਈ ਪ੍ਰੇਰਿਤ ਕਰਨਾ ਹੁੰਦਾ ਹੈ। ਉਹ ਸ਼ੁੱਧ ਉਚਾਰਨ ਅਤੇ ਸੁੰਦਰ ਲਿਖਾਈ ਦਾ ਅਭਿਆਸ ਵੀ ਖੂਬ ਕਰਵਾਉਂਦੇ ਹਨ। ਬੱਚਿਆਂ ਦੇ ਆਤਮ ਵਿਸ਼ਵਾਸ ਨੂੰ ਪੱਕਾ ਕਰਨ ਲਈ, ਦੂਰ ਦੂਰ ਹੁੰਦੇ ਮੁਕਾਬਲਿਆਂ ਵਿੱਚ ਉਹਨਾਂ ਨੂੰ ਸ਼ਾਮਿਲ ਕਰਵਾਉਣ ਲਈ ਆਪ ਲੈਕੇ ਜਾਂਦੇ ਹਨ। ਬੱਚਿਆਂ ਦੀਆਂ ਰਚਨਾਵਾਂ ਨੂੰ ਪੁਸਤਕ ਰੂਪ ਦਿੰਦੇ ਹਨ। ਹੁਣ ਤੱਕ ਉਹ ਬੱਚਿਆਂ ਦੀਆਂ ਦੋ ਪੁਸਤਕਾਂ ‘ਤਾਰਿਆਂ ਦਾ ਰੁਮਾਲ’ ਅਤੇ ‘ਪੈੜਾਂ ਦੇ ਪੈਂਡੇ’ ਪ੍ਰਕਾਸ਼ਤ ਕਰ ਚੁੱਕੇ ਹਨ। ਆਪਣਾ ਕਾਵਿ-ਸੰਗ੍ਰਹਿ ‘ਕੱਕੀਆਂ ਕਣੀਆਂ’ ਵੀ ਮਾਂ ਬੋਲੀ ਪੰਜਾਬੀ ਦੀ ਝੋਲੀ ਪਾ ਚੁੱਕੇ ਹਨ।
ਅੰਜਨਾ ਮੈਨਨ ਵੱਲੋਂ ਬੱਚਿਆਂ ਵਿੱਚ ਸਹਿਤ ਸਿਰਜਣ ਦੀ ਜਗਾਈ ਇਸ ਜੋਤ ਨੂੰ ਹੋਰ ਪ੍ਰਚੰਡ ਕਰਨ ਲਈ, ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰੇ ਵੱਲੋਂ,13 ਨਵੰਬਰ ਨੂੰ ਸਕੂਲ ਜਾ ਕੇ ਅਲਖ ਜਗਾਈ ਗਈ।
ਭਾਈਚਾਰੇ ਦੀ ਬੇਨਤੀ ਤੇ ਸਕੂਲ ਦੇ ਪ੍ਰਬੰਧਕਾਂ ਵੱਲੋਂ ਪਹਿਲਾਂ ਹੀ ਸਾਹਿਤ ਸਿਰਜਣ, ਸ਼ੁੱਧ ਉਚਾਰਨ ਅਤੇ ਸੁੰਦਰ ਲਿਖਾਈ ਦੇ ਮੁਕਾਬਲੇ ਕਰਵਾ ਲਏ ਗਏ ਸਨ। ਸਹੂਲਤ ਲਈ ਵਿਦਿਆਰਥੀਆਂ ਨੂੰ ਮਿਡਲ ਅਤੇ ਸੈਕੰਡਰੀ ਦੋ ਸ਼੍ਰੇਣੀਆਂ ਵਿੱਚ ਵੰਡ ਲਿਆ ਗਿਆ ਸੀ।
ਕਵਿਤਾ ਸਿਰਜਣ ਮੁਕਾਬਲੇ ਵਿੱਚ ਸਿਮਰਨਜੀਤ ਕੌਰ (ਮਿਡਲ ਵਰਗ) ਅਤੇ ਸੁਨੀਤਾ ਰਾਣੀ (ਸਕੈਡੰਰੀ ਵਰਗ),
ਸੁੰਦਰ ਲਿਖਾਈ ਮੁਕਾਬਲੇ ਵਿਚ ਪੁਨੀਤ ਕੌਰ (ਮਿਡਲ ਵਰਗ) ਅਤੇ ਖੁਸ਼ਪ੍ਰੀਤ ਕੌਰ(ਸਕੈਡੰਰੀ ਵਰਗ) ਅਤੇ
ਪੋਸਟਰ ਮੁਕਾਬਲੇ ਵਿਚ ਖੁਸ਼ਦੀਪ ਕੌਰ (ਮਿਡਲ ਵਰਗ) ਅਤੇ ਸਿਮਰਨਦੀਪ ਕੌਰ (ਸਕੈਡੰਰੀ ਵਰਗ) ਵਿੱਚ ਪਹਿਲੇ ਨੰਬਰ ਤੇ ਰਹੇ ਸਨ।
ਭਾਈਚਾਰੇ ਵੱਲੋਂ ਪਹਿਲਾਂ ਕੀਤੇ ਫੈਸਲੇ ਅਨੁਸਾਰ ਪੁਰਸਕਾਰ ਪਹਿਲੇ ਨੰਬਰ ਤੇ ਆਉਣ ਵਾਲੇ ਇਨ੍ਹਾਂ ਛੇ ਬੱਚਿਆਂ ਨੂੰ ਹੀ ਦਿੱਤੇ ਜਾਣੇ ਸਨ। ਪਰ ਮੁਕਾਬਲੇ ਵਿੱਚ ਹਿੱਸਾ ਲੈਣ ਵਾਲੇ ਸਾਰੇ ਹੀ ਬੱਚੇ ਇੱਕ ਦੂਜੇ ਤੋਂ ਚੜਦੇ ਸਨ। ਇਸ ਲਈ ਭਾਈਚਾਰੇ ਵੱਲੋਂ ਫੈਸਲਾ ਕੀਤਾ ਗਿਆ ਕਿ ਮੁਕਾਬਲੇ ਵਿੱਚ ਹਿੱਸਾ ਲੈਣ ਵਾਲੇ ਹਰ ਬੱਚੇ ਨੂੰ ਹੀ ਕਿਵੇਂ ਨਾ ਕਿਵੇਂ ਉਤਸ਼ਾਹਿਤ ਕੀਤਾ ਜਾਵੇ। ਇੰਜ ਹੀ ਕੀਤਾ ਗਿਆ।
ਪੰਜਾਬੀ ਭਾਸ਼ਾ ਦੇ ਇਸ ਉਜਲ ਭਵਿੱਖ ਨੂੰ ਉੱਤਮ ਸਾਹਿਤਕ ਪੁਸਤਕਾਂ, ਪੈਂਤੀ ਅੱਖਰਾਂ ਵਾਲੇ ਇਮਤਿਹਾਨ ਫ਼ੱਟੇ ਅਤੇ ਪ੍ਰਮਾਣ ਪੱਤਰਾਂ ਨਾਲ ਸਨਮਾਨਿਤ ਕਰਕੇ ਭਾਈਚਾਰੇ ਦੇ ਕਾਰਕੁਨਾਂ ਦੇ ਨਾਲ ਨਾਲ ਅਧਿਆਪਕਾਂ ਨੂੰ ਵੀ ਆਪਣਾ ਆਪ ਸਨਮਾਨਿਤ ਹੋਇਆ ਮਹਿਸੂਸ ਹੋਇਆ।
ਸਮੁੱਚੇ ਅਧਿਆਪਕ ਵਰਗ ਨੇ (ਹਰਪ੍ਰੀਤ ਕੌਰ, ਅੰਜਨਾ ਮੈਨਨ, ਹਰਮਨਦੀਪ ਕੌਰ, ਕੰਚਨ ਮਿੱਤਲ, ਹਰਕਮਲ ਕੌਰ, ਸਿਮਰਜੀਤ ਕੌਰ, ਰੀਤੀ ਗੋਇਲ ਸੁਦੇਸ਼ ਰਾਣੀ, ਪੂਜਾ ਗਰੋਵਰ, ਹਰਪ੍ਰੀਤ ਕੌਰ, ਵਤਨਦੀਪ ਕੌਰ, ਸਵਰਨਜੀਤ ਕੌਰ) ਸਾਰਾ ਸਮਾਂ ਸਮਾਗਮ ਵਿੱਚ ਹਾਜ਼ਰ ਰਹਿ ਕੇ, ਪੰਜਾਬੀ ਭਾਸ਼ਾ ਪ੍ਰਤੀ ਆਪਣੀ ਸਮਰਪਣ ਭਾਵਨਾ ਦਾ ਪ੍ਰਗਟਾਵਾ ਵੀ ਕੀਤਾ ਗਿਆ।
ਵਿਦਿਆਰਥੀਾਂ ਦੇ ਪ੍ਰੇਰਣਾ ਸ੍ਰੋਤ ਅਧਿਆਪਕ ਅਤੇ ਮਿੱਤਰ ਸੈਨ ਮੀਤ
ਦਰਸ਼ਕ ਵਿਦਿਆਰਥੀ
ਸਕੈਡੰਰੀ ਸ਼੍ਰੇਣੀ ਦੇ ਇਨਾਮ ਜੇਤੂ ਵਿਦਿਆਰਥੀ
ਮਿਡਲ ਸ਼੍ਰੇਣੀ ਦੇ ਇਨਾਮ ਜੇਤੂ ਵਿਦਿਆਰਥੀ
ਬੁਲਾਰੇ
ਮਾਨ ਸਨਮਾਨ ਦਾ ਦੌਰ
ਤਨ ਮਨ ਅਤੇ ਧਨ ਨਾਲ, ਬੱਚਿਆਂ ਨੂੰ ਮਾਂ ਬੋਲੀ ਪੰਜਾਬੀ ਨਾਲ ਜੋੜਨ ਅਤੇ ਫੇਰ ਇਸ ਦੇ ਵਿਕਾਸ ਅਤੇ ਪਸਾਰ ਲਈ ਪ੍ਰੇਰਨ ਲਈ, ਅੰਜਨਾ ਮੈਨਨ ਜੀ ਨੂੰ ਆਪਣੇ ਚਾਰੇ ਨਾਵਲਾਂ ਦੇ ਸੈਟ ਨਾਲ ਸਤਿਕਾਰ ਕੀਤਾ ਗਿਆ।
ਸਕੂਲ ਦੀ ਲਾਇਬਰੇਰੀ ਲਈ ਸਕੂਲ ਦੀ ਇੰਚਾਰਜ ਅਧਿਆਪਕਾ ਨੂੰ ਮਿੱਤਰ ਸੈਨ ਮੀਤ ਵਲੋਂ ਆਪਣੇ ਨਾਵਲਾਂ ਦਾ ਸੈਟ ਸਮਰਪਿਤ ਕੀਤਾ ਗਿਆ।
ਅੰਜਨਾ ਮੈਨਨ ਵੱਲੋਂ ਆਪਣੇ ਕਾਵਿ-ਸੰਗ੍ਰਹਿ ‘ਕੱਕੀਆਂ ਕਣੀਆਂ’ ਨਾਲ ਮਿੱਤਰ ਸੈਨ ਮੀਤ ਦੀ ਧਰਮ ਪਤਨੀ ਨੂੰ ਸਨਮਾਨਿਤ ਕੀਤਾ ਗਿਆ।
ਸਕੂਲ ਦੇ ਸਮੁੱਚੇ ਸਟਾਫ਼ ਅਤੇ ਵਿਦਿਆਰਥੀਆਂ ਵਲੋਂ ਮਿੱਤਰ ਸੈਨ ਮੀਤ ਨੂੰ ਵੀ ਨਿਘ ਅਤੇ ਸਤਿਕਾਰ ਦੀ ਨਿਸ਼ਾਨੀ, ‘ਪੰਜਾਬ ਅਤੇ ੳਅੜ’ ਵਾਲੀ ਲੋਈ ਨਾਲ ਸਤਿਕਾਰਤ ਕੀਤਾ ਗਿਆ।
ਬਾਲ ਦਿਵਸ
13 ਨਵੰਬਰ ਨੂੰ ਸਰਕਾਰੀ ਸਕੈਡੰਰੀ ਸਕੂਲ ਕਰਮਗੜ੍ਹ ਵਿੱਚ ਪੰਜਾਬੀ ਬੋਲੀ ਨੂੰ ਸਮਰਪਿਤ ਸਮਾਗਮ ਸੀ। । ਅਗਲੇ ਦਿਨ ਬਾਲ ਦਿਵਸ ਸੀ। ਬਾਲ ਦਿਵਸ ਤੇ ਬੱਚਿਆਂ ਨਾਲ ਬੈਠ ਕੇ ਬੱਚਾ ਬਣਨ, ਰਲ ਮਿਲ ਕੇ ਮੂੰਹ ਮਿੱਠਾ ਕਰਨ ਅਤੇ ਬੱਚਿਆਂ ਦੀਆਂ ਕਲਾ ਕਿਰਤਾਂ ਨਾਲ ਸਾਂਝ ਪਾਉਣ ਦਾ ਇਹ ਵਧੀਆ ਮੌਕਾ ਨਹੀਂ ਸੀ। ਸਕੂਲ ਇਨਚਾਰਜ ਨੂੰ ਬੇਨਤੀ ਕੀਤੀ ਗਈ ਕਿ ਬਾਲ ਦਿਵਸ ਅੱਜ ਹੀ ਮਨਾ ਲਿਆ ਜਾਵੇ।
ਪਹਿਲਾਂ ਬੱਚਿਆਂ ਦੀਆਂ ਕਲਾ ਕਿਰਤਾਂ ਦਾ ਆਨੰਦ ਮਾਣਿਆ ਅਤੇ ਫੇਰ ਸਭ ਨੇ ਲੱਡੂਆਂ ਨਾਲ ਮੂੰਹ ਮਿੱਠਾ ਕੀਤਾ।
ਅਖਬਾਰਾਂ ਦਾ ਸਹਿਯੋਗ
——————————————-
ਪਹਿਲਾ ਸਮਾਗਮ –ਮਾਲਵਾ ਕਾਲਜ ਬੋਂਦਲੀ ਸਮਰਾਲਾ
ਵਿਦਿਆਰਥੀਆਂ ਵਿੱਚ ਪੰਜਾਬੀ ਭਾਸ਼ਾ ਦੀ ਚੇਟਕ ਲਾਉਣ ਵਾਲਾ -ਪਹਿਲਾ ਸਮਾਗਮ ਬੇਹੱਦ ਸਫ਼ਲ ਰਿਹਾ
ਪੰਜਾਬੀ ਭਾਸ਼ਾ ਪਸਾਰ ਭਾਈਚਾਰਾ ਵੱਲੋਂ ਸਕੂਲਾਂ ਅਤੇ ਕਾਲਜਾਂ ਦੇ ਵਿਦਿਆਰਥੀਆਂ ਵਿੱਚ, ਪੰਜਾਬੀ ਭਾਸ਼ਾ ਦੇ ਵਿਕਾਸ ਅਤੇ ਪਸਾਰ ਵਿੱਚ ਦਿਲਚਸਪੀ ਵਧਾਉਣ ਲਈ ਸ਼ੁਰੂ ਕੀਤੀ ਗਈ ਸਮਾਗਮਾਂ ਦੀ ਲੜੀ ਦਾ ਪਹਿਲਾ ਸਮਾਗਮ 11 ਨਵੰਬਰ 2024 ਨੂੰ ਮਾਲਵਾ ਕਾਲਜ ਬੋਂਦਲੀ ਸਮਰਾਲਾ ਵਿੱਚ ਕੀਤਾ ਗਿਆ।
ਇਸ ਯੋਜਨਾ ਅਧੀਨ ਮਾਲਵਾ ਕਾਲਜ ਵਿੱਚ ਪੰਜਾਬੀ ਸਾਹਿਤ ਸਿਰਜਣ, ਗਾਇਨ, ਸ਼ੁੱਧ ਉਚਾਰਨ ਅਤੇ ਸੁੰਦਰ ਲਿਖਾਈ ਲਈ ਕਰਵਾਏ ਗਏ ਮੁਕਾਬਲਿਆਂ ਵਿੱਚ ਪਹਿਲੇ ਨੰਬਰ ਤੇ ਆਉਣ ਵਾਲੇ ਵਿਦਿਆਰਥੀਆਂ (ਅਰਸ਼ਪ੍ਰੀਤ ਸਿੰਘ, ਜਸਮਨਜੋਤ ਸਿੰਘ, ਅਰਸ਼ਦੀਪ ਕੌਰ, ਰਜਨਪ੍ਰੀਤ ਕੌਰ) ਨੂੰ ਪੁਸਤਕਾਂ, ਸਕੂਲ ਬੈਗ ਅਤੇ ਪਰਮਾਣ ਪੱਤਰ ਨਾਲ ਸਨਮਾਨਿਤ ਕੀਤਾ ਗਿਆ। ਪੰਜਾਬੀ ਸਹਿਤ ਵਿੱਚ ਰੁਚੀ ਪੈਦਾ ਕਰਨ ਲਈ ਵਿਦਿਆਰਥੀਆਂ ਨੂੰ ਪ੍ਰੋਫੈਸਰ ਗੁਰਦਿਆਲ ਸਿੰਘ, ਦਲੀਪ ਕੋਰ ਟਿਵਾਣਾ, ਮਿੱਤਰ ਸੈਨ ਮੀਤ ਦੇ ਨਾਵਲਾਂ ਅਤੇ ਰਘਬੀਰ ਢੰਡ ਦੀਆਂ ਚੋਣਵੀਆਂ ਕਹਾਣੀਆਂ ਦਾ ਸੈਟ ਦਿੱਤਾ ਗਿਆ।
‘ਨੌਜਵਾਨਾਂ ਨੂੰ ਪੰਜਾਬੀ ਭਾਸ਼ਾ ਦਾ ਗਿਆਨ ਹੋਣਾ ਜਰੂਰੀ ਕਿਉਂ?’ ਇਸ ਵਿਸ਼ੇ ਤੇ ਸੰਖੇਪ ਵਿੱਚ ਕੀਤੇ ਵਿਚਾਰ ਵਟਾਂਦਰੇ ਵਿੱਚ ਕਾਲਜ ਦੇ ਪੰਜਾਬੀ ਵਿਭਾਗ ਦੇ ਮੁਖੀ ਪ੍ਰੋਫੈਸਰ ਹਰਿੰਦਰਜੀਤ ਸਿੰਘ ਕਲੇਰ, ਮਿੱਤਰ ਸੈਨ ਮੀਤ ਅਤੇ ਪ੍ਰਿੰਸੀਪਲ ਹਰਿੰਦਰ ਕੌਰ ਨੇ ਆਪਣੇ ਆਪਣੇ ਵਿਚਾਰ ਪੇਸ਼ ਕੀਤੇ।
ਪ੍ਰਸਿੱਧ ਪੰਜਾਬੀ ਸਾਹਿਤਕਾਰ ਬਲਬੀਰ ਸਿੰਘ ਬੱਬੀ, ਸੁਰਜੀਤ ਵਿਸ਼ਾਦ ਅਤੇ ਨੇਤਰ ਸਿੰਘ ਮਾਤਿਉ ਦੀ ਹਾਜ਼ਰੀ ਨੇ ਬੱਚਿਆਂ ਨੂੰ ਹੋਰ ਵੀ ਉਤਸ਼ਾਹਿਤ ਕੀਤਾ।
ਵੱਡੀ ਗਿਣਤੀ ਵਿੱਚ ਵਿਦਿਆਰਥੀ ਤਾਂ ਸਮਾਗਮ ਵਿੱਚ ਸ਼ਾਮਿਲ ਹੋਏ ਹੀ ਪਰ ਪ੍ਰੋਫੈਸਰ ਜਗਦੀਪ ਸਿੰਘ, ਪ੍ਰੋਫੈਸਰ ਪ੍ਰਦੀਪ ਕੌਰ (ਐਨਐਸਐਸ), ਪ੍ਰੋਫੈਸਰ ਪਵਨਦੀਪ ਕੌਰ, ਪ੍ਰੋਫੈਸਰ ਇਮਰੋਜਪ੍ਰੀਤ ਸਿੰਘ, ਪ੍ਰੋਫੈਸਰ ਅਮਨਪ੍ਰੀਤ ਕੌਰ, ਇੰਦਰਜੀਤ ਸਿੰਘ ਅਤੇ ਨਿਰਵੈਰ ਸਿੰਘ ਦੀ ਹਾਜ਼ਰੀ ਨੇ ਸਮਾਗਮ ਦੀ ਹੋਰ ਵੀ ਸ਼ੋਭਾ ਵਧਾਈ।
ਭਾਈਚਾਰੇ ਵੱਲੋਂ ਕਾਲਜ ਦੀ ਲਾਇਬਰੇਰੀ ਲਈ ਪੰਜਾਬੀ ਦੀਆਂ ਉੱਤਮ ਪੁਸਤਕਾਂ ਦਾ ਸੈਟ ਭੇਂਟ ਕਰਨ ਦੇ ਨਾਲ ਨਾਲ ਮਾਂ ਬੋਲੀ ਪੰਜਾਬੀ ਦੇ ਪਸਾਰ ਅਤੇ ਵਿਕਾਸ ਵਿੱਚ ਜ਼ਿਕਰਯੋਗ ਯੋਗਦਾਨ ਪਾਉਣ ਲਈ ਪ੍ਰਿੰਸੀਪਲ ਹਰਿੰਦਰ ਕੌਰ ਅਤੇ ਪ੍ਰੋਫੈਸਰ ਹਰਿੰਦਰਜੀਤ ਸਿੰਘ ਕਲੇਰ ਦਾ ਸਤਿਕਾਰ ਵੀ ਕੀਤਾ ਗਿਆ।
ਸਮਾਗਮ ਦੀ ਗਾਥਾ ਤਸਵੀਰਾਂ ਦੀ ਜ਼ੁਬਾਨੀ
ਮੀਡੀਆ ਸਹਿਯੌਗ
More Stories
ਜਿਲ੍ਹਿਆਂ ਵਿਚ ਸਮਾਗਮ
ਜਿਲ੍ਹਾ ਇਕਾਈਆਂ ਨਾਲ ਸੰਪਰਕ
ਸਿਆਸੀ ਧਿਰਾਂ -ਤੱਕ ਪੁਹੰਚ